Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_29

<begin>
domaes die hont jan die weuel jan die brune willem die Corte willem die scoutete gherard die weuel ende jan mont wie schepenne vanden vrien doen teverstane allen den goenen die dese lettren sullen zien & horen lesen
</begin>
<main>
dat camen vor ons diederic f reinvards edins ende Margriete sin wijf ende gaven wettelike ghifte den here gherarde capellaen vanden wijngarde tes prochie papen boef vanden wijngarde & ter tve capellanen boef & ter scolieren boef & tes costers boef vanden wijngarde vorseit van enen ymete lants tve roeden lants Min jof me lecghende int ambocht van ghistelle indie prochie van honkevliet vp die ofstede daer die vorseide diederic woent & nortwest van gherards lande sins broeder nort over dat ledekin & of oestalf griele capeels lande & of sutalf bouden daniels lande & of westalf dis vorseits diederix lande & sie weddets den here gherarde vorseid tes prochie papen boef ter capellane boef ter scoliere boef & tes costers boef vanden wijngarde vorseid aldit vorseide lant tewette tewaerne wech & lant & quite lant te haere alre boef vorseit vrien eghindome jeghen elken meinsche ende dese vorseide here gherard gaf weder van haerre alre haluen die hier vorseit sin dien vorseiden diederike & Margrieten sinen wiue aldit vorseide lant te Erfliken chense omme viertiene scheleghe tsiaers goedere vlaemscher peneghe teghelden tiene scheleghe telken houkevliet Medewintere & viere sceleghe te sinte jans messe die daer naest comt & coep & versterfnesse ghelijc den chense
</main>
<end>
Ende omme dat wie vorseide scepenne stonden over dese dinc & willen datse vast & ystade bliue so hebben wie dese lettren te kennessen hutanghende yseghelt met onsen zeghellen dit was ghedaen saterdaghes vor sinte donaes daghe anno domini M CC Lxxx primo
</end>