Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_30

<begin>
Wie Diederic die vos Domaes die hont Willem die scoutete Jhan van den zande Jhan die brune Jhan die weuel Willem van cleihem Jhan mont Boudene van laepscuere Weinin van varsenare Hughe van boyenghem ende Gherard die weuel scepenen van den vrien brugschen ambochte doen te wetene allen den ghoenen die dese lettren zullen zien ende horen lesen
</begin>
<main>
Als van den contente ende van der calaengen die jhan woubrechts zoene elemoeden zoens hadde vp den abbet ende vp die kerke van sinte pieters van ghent ouer hem ende ouer die ghoene die aeldinghe waren met hem van der voerseider elemoeden doet ende van enen vinderscepe dan of dat wie zaghen enen sartre ende ghelesen was voer ons sprekende jn dese woerde Daer cam voer ons die here willem capellaen van oedenghem procurerre van der voerseider kerke van sinte pieters die macht hadde van tsabbets haluen voerseit bi des abts letteren voerseit die wi zaghen ende ghelesen waren voer ons vinders te nemene in der ghere stede diere ghebraken ende al te doene dat ten voerseiden vinderscepe toe behoerde ghelijc den abbet of hiere zelue hadde ghewesen present also als ons daer wel kenlic was bi den voerseiden letteren van den abbet of een zide ende die voerseide jhan woubrechts zoene elemoeden zoens of ander zide ende daer nam die voerseide here willem jn die stede van minen here hughen tshere heinrics zoene die vindere was van des voerseits abbets haluen ende die daer ghebrac enen heinric den moutenare den clerc ende dien wedde boudene hughen zoene te bringhene ende te doen zegghene bin achte daghen Ende die voerseide jhan woubrechts zoene nam jn mesters willems cleys stede die daer ghebrac enen willemme alaerds zoene vindere te sine van dies voerseids jhans haluen diere ghelike dat die voerseide meester willem was ende die voerseide willem alaerds zoene wedde zelue te zegghene bin der voerseider termine
</main>
<end>
Ende omme dat wie voerseide scepenen van den vrien waren ouer dese sticken ende si voer ons ghehandelt ende ghedaen waren wettelicke so hebben wie dese letteren ghezeghelt met onsen zeghelen jn kennessen Dit was ghedaen tsaterdaghes na sinte denijs daghe jnt jaer ons heren als men screef sine jncarna[tie] [tvelef hondert] ende een ende tachtentich
</end>