Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_31

<begin>
Jhan die hamer ruddre Gillis tshere hughes zoene willem die scoutete jhan die weuel lambrecht diederics zoene jhan mont ende Gherard die weuel wie scepenen van den vrien doen te wetene allen den ghoenen die dese lettren zullen zien ende horen lesen
</begin>
<main>
Dat camen voer ons weitin hughes zoene ende hannekin zijn zoene ende ghauen wettelicke ghifte Broeder lambrechte van sinte claren ter abdessen boef ende tsconuents boef van sinte claren van vierdalf line lands lichtelic min of lichtelic me ligghende binden ambochte ende bin der prochien van nieumonstre vp den waterganc bezuithalf foitins ende bezuiden der hoelebrucghe ende het heet noefstickelkin ende sie halmedens hem te wetten ende sie weddet hem te waerne te wetten vri lant ende quite lant wegh ende lant met sire rechter scout ter voerseider abdessen ende tsconuents vrien eghindoeme jeghen elken mensche
</main>
<end>
Ende omme dat wie scepenen voerseit willen dat dese voerseide sticke bliuen vast ende ghestade so hebben wie dese lettren ghezeghelt met onsen zeghelen jn kennessen Dit was ghedaen jnt jaer ons heren als men screef sine jncarnatie tvelef hondert ende een ende tachtentich tsaterdaghes na sinte donaes daghe
</end>