Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_32

<begin>
min here bouden die broekre ruddre hughe vanden houe jan die brune jan aket jan die boye jan van woemen ende gherard die weuel wie scepenen vanden vrien doen te verstane allen den goenen die dese lettren sullen sien iof horen lesen
</begin>
<main>
dat cam vor ons jan cleneman ende margriete siin wijf ende gaven wettelike ghifte janne blancaerde klerc van sinte marien in brucghe ter kerken boef van sinte marien in brucghe van viere ymete lands ende viere ende zeventich roeden lands lichtelic min iof me licghende binnen ten ambochte van dudsele & in die prochie van coolkerke & van desen vorseiden lande so leghets viere linen & xliiij roeden lands beostalf an rontshardsweg & heet die hoec & viere linen & xciij roeden lands licghen tere stede heet langhestic een ymet & xxxvij roeden lands licghen af nortalf maes roden lande & sie weddents hem al dit vorseide land weg ende land ende quite land te wetten te waerne ter vorseider kerke vrien eghindome boef vort so gaf weder die vorseide jan blancard vander vorseider kerken aluen dien vorseiden janne clenemanne & margrieten sinen wiue al dit vorseide land te cense tote tien jaren die erst comen elc ymet lands omme xxv s siars goedere vlaemscher peneghe te gheldene te drien terminen binnen den jare een dardendeel telken sinte jans messe middels somers een ander dardendeel te medewinter die dar naest comt & een darde dardendeel te alf maerthe die dar naest comt &
</main>
<end>
in kennessen van deser dinc dat wie vorseide scepenen willen dat soe vast & ghestade bliue so hebben wie dese lettren gheseghelt met onsen zeghellen vtanghende dit was ghedaen in alre heleghen havonde anno domini m cc lxxxj
</end>