Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_34

<begin>
Heineman vander biest Willem vander lo Oste vten broeke Riquaerd vander he Jan die fockere diedric vanden lene ende willem van scardau Wie scepenen vanden sieseelschen doen tewetene allen den goenen die dese lettren sullen sien jof horen lesen
</begin>
<main>
dat quamen voer ons hughe vander coutere ende ghertrud siin wijf ende gauen wetteleke ghifte meester simoene portre in brucghe van tvintich ymete lands onder meersch land ende ander land lichteleic meer jof min licghende binden ambochte vanden sieseelschen ende binder prochie van oedelem tere stede heet ter coutere jn gherouds broec ende in cobbouds hoec ende daer dese hughe vander coutere Ende ghertrud siin wijf vp woen Ende sie weddets hem tewette tewaerne ieghen elken mensche wech ende land ende quite land met alsulker scult alst ghelt te dis voerseids meester simoens vrien eghindoeme vord doen wie tewetene wie voerseide scepenen vanden sieseelschen dat dese voerseide meester simoen gaf weder vp te eerveleken chense desen hughen vander coutere ende Ghertruden sinen wiue al dit voerseide land omme drie pond ende drie capoene goeder vlaemscher peneghen tsiaers tegheldene elkes jaers dene helt vanden peneghen te sinte jans messe ende dander helt te sinte bamesse metten drien capoen
</main>
<end>
ende omme dat wie voerseide scepenen waren ouer dese sticken ende dat wie willen datse vast bliue ende ghestade so hebben wie tekennessen dese lettren ghezeghelt met onsen zeghelen dit was ghedaen Jn sinte andries auende anno domini m cc lxxx primo
</end>