Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_4

<begin>
Wie scepenen van den vrien van den brughschen amboechte jan die hamere rudder weinin van versenare reinuaerd porin gherolf van kaluekete arnoud filius heinemans gheraerd die weuel Ende wilsin van scaerpinghe doen tewetene alle den ghenen die dese lettren sullen zien jof horen lesen
</begin>
<main>
Dat boudene van zedelgheem Ende joncvrouwe beatrice siin wijf quamen voer ons Ende gauen claise tsere jacobs cleerch van erdenburgh deken van den carstinede van brughe wettelike alm ende ghifte van xvii s renten te gheldene te sinte jans messe meduaerd zoemers Ende te sinte bamesse jaerliecs te siins heren boef dies vorseide jacobs goeder vlaemscer peneghe ende ewelike rente elschs jaers ten ghenomden terminen Die welke tiene sceleghe siin beset vp viere line lants dat heeth verlizemoede belch jn die prochie van lopheem te ovdengheem Ende voer marcelis hofstede die welke viere linen out carsteloet herin omme die ghenomende tiene sol die hie ghelouede tegheldene elx jaers dien vorseyden here jacobe ewelike ten ghenomenden terminen met wllen cope & wllen versteruenesse alst gheuallet Ende die seuene sol ende vi de 1/23n siin beset vp clais clerchs hofstede die costre was van loppheem daer siin huus ende sine scoere vp staet ende vppe tlant daer die boengaerd in staet achterwaert gaende bider kerke van lopheem die me ghelt elx jaers te sinte bamesse met wllen cope ende wlre versternesse alst gheuallet Ende zie boudene ende joncvrouwe beatrice wedden dien ghenomenden clerch ties vorseids here jacobs boef die vorseide seuentien sceleghe ende sesse peneghe metter ghenoemender besettinghe te wette te waerne ende vri ende quite tiheghen elken mensche met dier ghenomende rente
</main>
<end>
Ende omme dat wie vorseid schepenen willen dat dat dit vast bliue ende ghestade zo hebben wi te kennessen van wareid theweliker ghedinkenesse onse zeghele ghehanghen an dese lettren Dit was ghedaen int jaer der incarnatioen ons heren als men scriuet m cc ende tachtentich tsfrindaghes voer onser vrouwen dach ter lichtmesse
</end>