Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_5

<begin>
Wie Gillis dop tsere pieters soene jacob bonin alard tshere alards soene jhan vten zacke ende meus prouensijn scepenen tien tiden binder poert van brucghe doen te wetene allen den ghoenen die dese lettren zullen zien of horen lesen
</begin>
<main>
dat camen voer ons roebsoete tshere kerstiaens soene jhan alardijn ende pieter steenkin wettelicke voghede hanne brunen f clais walekins ende marselis f ihans van bonem dies hannes broeder ende sie ghauen vp alse voeghede dies hannes ende marselis den here alarde lamme ter abdessen ende tsconuents boef van sinte claren in brugghe vijf buinre moers lichtelic min of lichtelic me ligghende jn den moer die men heet die moer van ardenburgh tusschen vakeweghe ende der riselvere die welke verstoeruen was vp die voerseide hanne ende marselise van tsheren jhans brunen doot ende sie ghauene hem vp ouer drie hondert ende vichtich pont parisise die sie sculdich waren alse voeghede der abdessen ende den conuente voerseit van tsheren jhans brunen testamente ende sie ghauere hem of wettelicke ghifte ende sie halmedens hem alse voeghede ter voerseider abdessen ende tsconuents boef
</main>
<end>
Ende omme dat wie scepenen voerseit willen dat die voerseide sticke bliuen vast ende ghestade so hebben wie dese lettren ghezeghelt met onsen zeghelen jn kennessen Dit was ghedaen jnt jaer ons heren als men screef sine jncarnatie tvelef hondert ende tachtentich tsdinxendaghes na onser vrouwen daghe ter lichtemesse jn toestende van den ghiselhuise van der poert van brugghe
</end>