Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_7

<begin>
Boudene die broekere ruddre jhan van poele reinuert porin jhan die weuel domaes die hont Oliuier van der haghe Gillis diedrics soene weinin van varsenare heinric scaefscacht hannoet casekin woutre f boidins ende boudene van laepscuere wie scepenen van den vrihen doen te wetene allen den ghoenen die dese lettren zullen zien of horen lesen
</begin>
<main>
Dat camen voer ons alse voer scepenen woutre willekins soene ende margriete sijn wijf ende ghauen wettelicke ghifte broeder lambrechte van sinte claren ter abdessen ende tsconuents boef van sinte claren in brugghe van neghene jmeten ende ene line ende tve roeden lands lichtelic min of me ligghende binden ambochten van dudsele ende van zuenkerke Ende van dien lande heten zeuene linen riquards slarins hofstede Ende tve jmete ende een vierendeel jmeets leghets bezuithalf an boudens claimans hofstede ende het was jcocht ieghen margrieten heinebrants Ende viere linen ligghen benoerden hannekins adelisen soens die waren jcocht ieghen margrieten heinbrands Ende benoerthalf an tselue stic leghets een line ende zeuene ende tvintich roeden dat was jcocht ieghen margrieten bleiuins Ende vierdalf line dat was ghecocht jeghen jhanne den poertre ende leghet voer lodewijcs zoeteghoeds Ende tve jmete vichtich roeden min dat heet riquards willemans soens hofstede Ende sie halmedens hem te wetten van al den voerseiden lande Ende sie weddent dien voerseiden broeder lambrechte te wette te waerne vri land ende quite land wech ende land met sire rechter scoud ter voerseider abdessen ende tsconuents vrien eghindoeme Voert so ghauen die voerseide woutre ende margriete sijn wijf wettelicke vp voer ons dien voerseiden broeder lambrechte ter abdessen ende tsconuents boef voerseit ene woeninghe die sie hadden staende te cleihem ende alle die cateile die sie hadden binden brugschen ambochte Ende alt recht ende al die macht die siere an hadden of hebben mochten der voerseider abdessen ende conuente bleuiins haren vrihen wille mede te doene
</main>
<end>
Ende omme dat wie scepenen voerseit willen dat die voerseide sticke bliuen vast ende ghestade so hebben wie dese lettren ghezeghelt met onsen zeghelen jn kennessen Dit was ghedaen jnt jaer ons heren als men screef sine jncarnatie tvelef hondert ende tachtentich tsvriendaghes voer sinte pieters daghe ter coudermesse
</end>