Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_8

<begin>
Reinuert porin jhan die weuel Gillis diedrics soene Weinin van varsenare domaes die hont woutre boidins soene ende hannoet casekin Wie scepenen van den vrihen doen te wetene allen den ghoenen die dese lettren zullen zien of horen lesen
</begin>
<main>
Dat camen voer ons margriete wouters willekins soens wijf ende woutre willekins soene hare man ende ghauen wettelicke te chense broeder lambrechte van sinte claren ter abdessen boef ende tsconuents boef van sinte claren in brucghe drie jmete ende een half jmet lands lichtelic min of me te diere voerseider margrieten liue omme enen vlaemschen penning elx jaers Ende dat zelue land helt die voerseide margriete dies wouters wijf te bileuinghen van soykine haren eersten man Ende dit land leghet binden prochien van dudzele van vtkerke ende van zuenkerke also alst hare gheuallet in dele ieghen grielen harre dochter Ende van al dien voerseiden lande word die voerseide broeder lambrecht wettelic chensere diere margrieten ende wouters haers mans alse van der abdessen haluen & tsconuents haluen voerseit te dier voerseider margrieten liue omme enen vlaemschen penning elx jaers also alst voerseit es
</main>
<end>
Ende omme dat wie scepenen voerseit willen dat die voerseide chens bliue vast ende ghestade so hebben wie dese lettren ghezeghelt met onsen zeghelen jn kennessen Dit was ghedaen jnt jaer ons heren als men screef sine jncarnatie tvelef hondert ende tachtentich tsvrinendaghes voer sinte pieters daghe ter coudermesse
</end>