Compilatiecorpus Historisch Nederlands 1.0 (CHN): ambtelijke teksten 1250-1800: brugge_1281_9

<begin>
Heineman vander Biest Willem vander Lo Oste vten Broeke Jehan die fockere Diederic vanden lene Riquard van der he ende willem van scardau Scepenen vanden zieselscen tien tiden dat dese sarter ghemaect was doen te wetene alle den ghonen die desen sarter sullen sien iof horen lesen
</begin>
<main>
dat quam voer ons als voer scepenen magriete wouters wedewe van den hulse ende heilsoete har dochter ende ghauen wettelike halme ende ghifte mester jehanne van vtkerke van viue jmete & van enen haluen jmete meerschen ende lands dat was wouters vanden hulse ligghende jn Bribrekers meersch jntambocht van zieselle ende in die prochie van odelem Ende dit lant ende meersch so wedden si hem te wette te warne jeghen elken mensche te sinen vrien eghindome vri lant & meersch & quite lant & meersch & wech lant & meersch met xij d te scouden iars diemen ghelt ten brieuen tarsebroec
</main>
<end>
Dit was ghedaen jnt jaer ons heren als men scrijft sijn jncarnation m cc & vier waerf tuintich des naest vridaghes na onser vrouwen daghe jn marte Ende omme dat wie willen dat dese dinc vast bliue ende ghestade so hebben wie vorseide scepenen desen sarter gheseghelt vthanghende met onsen zeghelen
</end>