Compilatiecorpus Historisch Nederlands 1.0 (CHN): ambtelijke teksten 1250-1800: brugge_1284_1

<begin>
bouden die broekere ruddre hughe van boyenghem oliuier vander haghe Jan aket Tierkin f ghiselins gillis f Ser hughes pieter f Ser hughes gillis f wouters ende gherard die weuel wie scepenen vanden vrien doen te wetene alden goenen die dese lettren sullen sien ende horen lesen
</begin>
<main>
dat cam vor ons beatrise van werde boudens wedewe van werde jan haer soene parnele haer dochter bertilt haer dochter ende gauen wettelike ghifte broeder niclaise van sinte marien magdalenen tshuus boef van sinte marien magdalenen van tveen ymeten lands lichtelic meer iof min ligghende binden ambochte ende binder prochie van dudsele vanden wilken lande leghets een ymet boemgard lands an die nordside van haerre scuere an hare hofstede streckende nordward ende west waerd ende heet pudevane ende een ymet leghets west waerd ouer den wech tenden haren damme ende den boemgarde ende heet die langhe maet ende sie weddens hem te wette te waerne ieghen elken mensche wech ende land ende quite land ende sonder scult tshuus boef van sinte marien magdalenen rechten eghindoeme Ende dese vorseide broeder niclais van sinte marien magdalenen gaf weder vp van tshuus haluen van sinte marien magdalenen te erueliken chense aldit vorseide land beatrisen van werde omme tvintich sceleghe goeder vlaemscher peneghen erueliker renten siaers ende een pond was te cope ende te versteruenessen alst gheualt te gheldene jn elc jaer te paschen
</main>
<end>
ende omme dat wie vor seide scepenen vanden vrien waren ouer dese sticken ende wie willen datse vast bliue ende ghestade so hebben wie te kennessen dese lettren ghezeghelt met onsen zeghelen dit was ghedaen sfrijndaghes na half april anno dominj m cc lxxx quarto
</end>