Compilatiecorpus Historisch Nederlands 1.0 (CHN): ambtelijke teksten 1250-1800: brugge_1286_1

<begin>
Tote alle den ghenen die dese lettren sullen sien ende horen lesen thiederic die vos jhan weuel jhan die brune Gherard die weuel hughe van boyenghem jhan mont weinin van varsenare ende willem die corte Scepen van den vrien Groetinghe wie doen ju te wetene
</begin>
<main>
dat cam vor ons in ybanne virscharre broeder hughe van Oestborch als die ghene die wettelike was in die stede broeder willems van caprike mester van den hospitale van sente ihans huis in brucghe ende nam raet ende taleman ende vermat hem hulpe an scepen dat hie hadde versocht te pandene vans huis haluen vorseit enen heinoet f moenards binden ambochte camerlinx van vichtich sceleghen siaers renten Ende dat die verachtert waren so varre dat het ware ghelopen tote xxviii lb die welke l s siaers waren ende sijn beset vp sesse ymete ende ene line lants licghende binne den ambochte camerlinx Danof leghets i 1/2 jmet in die hofstede daer heinoet vorseit woende ende dat heet homlop vort so leghets iiii linen an doestside van den damme van der hofsteden vorseit ende heet lisen stic vort so leghet iii 1/2 jmet nevens den waterganghe tenen sticke dat men heet die reep Ende dat hiene van desen xxviii lb vorseit hadde te banne bereden ende woeste ende al te wetten Ende begherde dat men dade ten gronde vans huis haluen vorseit te al desen vorseiden lande Ende daer maende ons die crichoudre van den rechte Ende daer wijsden wie kenneden scepen alse vele alst sculdich waren te kenne dat also ghevaren ware als broeder hughes taleman vorseit hem vermeten hadde ouer broeder hughe jn sire tale Dat men dade ten Gronde vans huis haluen vorseit van al desen vorseiden lande Ende daer dedene die crichoudre der toe also alst ywijst was ende te wetten
</main>
<end>
jn kennessen van welken sticken wie scepen vorseit hebben dese lettren beseghelt met onsen seglen vthanghende dit was ghedaen saterdaghes na sente luix dach Anno domini m cc lxxx sexto s
</end>