Compilatiecorpus Historisch Nederlands 1.0 (CHN): ambtelijke teksten 1250-1800: brugge_1288_1

<begin>
Wie jan van Ertsberghe Ende Robloot Cant scepenen in brucghe te dien tiden dat dese dinc vor ons ghedaen waren doen te wetene allen den goenen die dese lettren zullen zien iof horen lesen
</begin>
<main>
dat Camen vor ons als vor scepenen wouter vanden torre ende maergriete siin wijf ende gillis die muentere Ende boudelod van oudenbuergh die grawerkere alse voghede van hannekine ende pieterkine f pieter hagheninx ende gauen halme ende wettelike Ghijfte lammine vander leye den bakere portere in brucghe vanden rechten achtendendele van viere husen staende of zuidalf Coeninx brucghe naesten ser bouden priems woeninghe was of zuidalf ende also zuidwaerd staende ende streckende tote enen huse daer Colaerd aluerdoe deelnamere an es welke husinghen staen vp ser jan hubrechts land ende ander diere toe behoren ende van al datter ertvast ende nagheluast an es ant achtendedeel vander husinghe vorseid gheliic dat vorseid es Ende die vorseide wouter vanden torre ende margareta siin wijf ende gillis die muentere Ende boudelood van oudenbuergh alse voghede vanden vorseiden kindren wedden ende beloueden dien vorseiden lammine vander leye dit vorseide achtendedeel van den viere husen vorseid ghelijc dat hier vorseid es te wetten te waerne te zinen rechten Eghindome jeghen elken mensche
</main>
<end>
Ende in kennessen van deser dinc dat wie vorseide scepenen willen dat soe vast ende ghestade bliue sso hebben wie dese lettren te kennessen vtanghende gheseghelt met onsen zeghellen dit was ghedaen dincsendaghes na meye daghe anno domini m cc lxxx octavo
</end>