Compilatiecorpus Historisch Nederlands 1.0 (CHN): ambtelijke teksten 1250-1800: brugge_1289_1

<begin>
Wi diederic die vos jhan van blankenberghe oliuier vander haghe heinric scauescacht gherolf van caluekete jhan mont boudene f boudens willem van wateruliet Ende gielis f wouters scepenen vanden vrien doen te wetene allen den ghenen die dese lettren sullen zien ende horen lesen
</begin>
<main>
dat quamen vor ons wilsoete tanx zone ende adelisa sijn wijf ende ihan dies wilsoets zone vorseit ende gauen wettelike halm ende ghifte den here ihan wippen capellaen mins here zeghers van bellen van viere ende een half ghemeten lands lichtelic min jof lichtelic meer ligghende in die prochie ende int ambocht van cleemskerca besuden der kerken oestouer die cauchiede te desen benomenden sticken half die hofstede daer die vorseide wilsoete vp woent an doest zide i line ende xxv Roeden jndie meet nord ouer i m zuut ouer andie hofstede an doest zide ij 1/2 line ende oest ouer die hofstede vij linen Ende die vorseide wilsoete adelisa ende ihan wedden dien vorseiden here ihanne al dit vorseide lant wech ende lant vri lant ende quite lant te wette te waerne te wllen eghindome met drjendartich scheleghen goeder vlaemscher peneghen diet ghelt elcs iaers sonder andre scout Vord gaf die vorseide here ihan al dit vorseide lant dien vorseiden wilsoeten ende adelisen ende ihanne te erueliken chense omme viertich scheleghe goeder vlaemscher peneghe te gheldene elcs iaers dene helt te sente martins messe in den winter ende dander helt telken meyedaghe die daer naest coemt ende coep ende versterfnesse ghelijc den chense alst gheuallet
</main>
<end>
Ende omdat wi vorseide schepenen willen dat dit vast bliue ende ghestade sso hebben wi dien vorseiden here ihanne dese lettren gheseghelt vthanghende met onsen zeghelen Dit was ghedaen in die vrie virscarne saterdaghe na sente baselis daghe anno domini mcclxxx nono goerder
</end>