Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_1

<begin>
WJe Schepene ende die ghemeentucht vander steide van Brucghe Doen tewetene alle Dengoenen die deise lettren zullen zien jof horen leisen
</begin>
<main>
dat wie omme die nood van onser steide van brucghe hebben vercocht Catelinen Jans deikens dochter wilen porters van brucghe die hie hadde bi ver grielen zinen wiue ser lammin loevins dochter in die wulhuus strate wilen was oc porters van brucghe twelef pond vlaemsche jaerlixer Renten teharen liue om ene benamede summe van peneghen die zoe ons heuet in goeden ghereden peneghen van haren propren cateile wel ende vulcomenlike vergolden ende die wie van haren hebben ontfanghen ende besteid ende bekerd in die orebare van onser vorseider steide van brucghe De welke twelef pond jaerlexer renten wie belouen der vorseider catelinen ende elc zonderlanghe van ons ollen dat wiese hare jof haren zekeren bode zullen ghelden ende doen ghelden binnen der steide van brucghe elkes jaers van jare teiare olso langhe ols zoe leuet te twen paiementen Euengroten dats tewetene zes pond te sinte jans baptists daghe midszomers die Eerst comet ende zes pond te medewintre daerna comende ende olso die vorseide twelef pond renten elkes jaers van jaere teiaere te dien vorseiden twen paiementen olso langhe ols zoe lijf heuet in haren lachhame in zowat state van leuene dat zoe zj Ende in zowat habite es hit in Religioene jof ter wereld ende tenden hare liue zo zouden wie werden quite los ende leidech van dien vorseiden twelef ponden jaerlexer renten tegheldene tieghen hare hoir ende tieghen elken andren mensche Ende olle deise vorseide dinghe ende elke zonderlanghe zo belouen wie olle ende elc zonderlanghe van ons ollen der vorseider Catelinen dat wiese hare wel ende ghetrouwelike zullen houden ende doen houden ende dat wiere in ghere maniere tieghen zullen ganghen no ding doyen die ons jof die na ons comen zullen mach comen tehulpen jof tebaten ende catelinen vorseid tescaden iof tederen Ende hier toe zo binden wie ons ollen ende elken zonderlanghe van ons ollen ende olle die goene die na ons comen zullen Schepene ende ghemeentucht vander steide van Brucghe
</main>
<end>
Jn orconschepen vander welker ding wie schepene ende ghemeentucht vorseid hebben deise huuthanghende lettren idaen zeghelen metter steide zeghele van Brucghe Dit was ghedaen int jaer ons heren alsmen schreef van zinen jncarnatioene Duzentich twe hondert vierewareuen twintich ende Neghene smoreghens van Niewe daghe
</end>