Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_12

<begin>
Wie jan van poele jan van lembeke gillis f ser hughes oliuier vander haghe heinric die grote alaerd f ser hughes storems ende willem die scoutete scepenen vanden vrien doen te wetene allen den goenen die dese lettren zullen zien iof horen lesen
</begin>
<main>
dat cam vor ons dancaerd f pieters ende cateline ziin wijf ende gaven wettelike ghiifte heinemanne den cappere van drien ymeten lands lichtelic min iof me licghende binnen den ambochte van ardenbuergh in die prochie van sinte marien of nordalf ende of oestalf ghiselins weuers & leghet tusschen hughe bekelins lande ende vermabelien dancards lande streckende anden herewegh ende heet dat grote land ende bruemmans land ende sie weddents hem al dat vorseide land wegh ende land ende quite land te wetten te waerne te zinen rechten eghindome ieghen elken mensche
</main>
<end>
Ende in kennessen van deser dinc dat wie vorseide scepenen willen dat soe vast ende ghestade bliue so hebben wie dese lettren te kennessen vtanghende gheseghelt met onsen zeghellen dit was ghedaen saterdaghes nader triniteit anno domini m cc nonogesimo
</end>