Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_13

<begin>
</begin>
<main>
Willem amiis sone ende bele siin wiif ghauen wettelike ghifte den here arnoude van ardenburgh portwaerdere van der does ter porte boof van der does van enen ghemete lants ende dartich roeden ende ene halue roede lants lichtelic min jof meer ligghende bin der prochie van ramscapelle benorthalf wouters boudens soens lande ende beoesthalf der aermer lande van ramscapelle vorseid an die suitside van den sticke daer siin huis vp staet ende sine bome twelke lant hetet snickers hofstede Ende dese vorseide willem amiis sone ende bele siin wiif weddets desen vorseiden here arnoude te wetten te waerne ter porte boof vorseid dit vorseide lant wech ende lant ende quite lant met siere rechter scult Ende dese vorseide here arnoud van ardenburgh ghaf desen vorseiden willemme dit vorseide lant te wetteliken chenze te aleuen jaren van der porte haluen van der does vorseid omme zeuentiensceleghe ende achte peneghe goeder vlaemscher peneghe elx jaers te gheldene dene helt van den ersten jare te sinte bauesmesse die erst coempt ende die andre helt te medewintre die daer naest coempt van den andren tiene jaren so es men sculdich te gheldene die ene helt telken sinte jans messe middels somers ende die andre helt telken sinte bauesmesse die daer naest coempt Ware oec dat sake dat dese vorseide willem amiis sone ware verachtert van sinen chenze jeghen die vorseide porte van der does also vele als van tveen peneghen vlaemschen daer ne mochte niemen hant doen no an siin huis no an sine bome dat vp dit vorseide lant staet tote diere wile dat dese vorseide porte hadde haren chens het ne ware bi sportwaerders wille van der does vorseid
</main>
<end>
Dit kennen redenaers vppe sproefs willem ghuters sone ende jan lamsoets sone Dit was ghedaen jnt jaer ons heren als men screef siin jncarnatioen Tualefhondert ende Neghentich tsaterdaeghs vor sinte barnebaes daghe
</end>