Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_14

<begin>
Wie jhan van vutkerke ruddra jhan van poele diederic die vos reivaerd porin jhan van caedsand bouden f boudens gheraerd die goes heinric die grote ende wouter die vos scepen vanden vrien doen te wetene alle den gonen die dese letteren sullen sien ende horen lezen
</begin>
<main>
dat quamen vore ons willem f wouters gooskins ende lizebette siin wiif ende gaven wetelike ghifte gherarde f pieters van drien ymeten lands lichtelic min of meer ligghende binder prochien van sinte baues ende binden ambochten van ysendike ende van oostburgh het leghets tve ymete lands van desen vorseiden lande lichtelic min of meer binden ambochte van ysendike vorseid streckende oostwaerd vander ware ende heet wilde leven land ende het leghets een ghemet lands lichtelic min of meer van desen vorseiden lande binden ambochte van oostburgh vorseid ende jn die hofstede daer dese vorseide willem f wouters vp woent vri land quite land met siere rechter scout ende wech ende land ende sie weddes hem te wetten te waerne jeghen elke mensche te dis voorseids gheraerd f pieters vrien eghindoeme ende vort quam vore ons gheraerd f pieters vorseid ende gaf willem f wouters ende lizebetten zinen wive al dit vorseide land te aerveleken senze omme tvintich sol goeder vlaemscer peneghen elx jaers ende desen vorseiden sens te gheldene te meduwinter die eerste coemt elx jaers met enen pont was te cope ende te versterfnessen
</main>
<end>
ende omme dat wie willen dat dese dinc si vast ende ghestade blive so hebben wie scepen vorseid jn kennessen dese letteren ghezeghelt met onsen zeghelen vuthanghende Dit was ghedaen sater daghes naer sinte bazelis daghe anno domini m cc nonogesimo
</end>