Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_17

<begin>
Wie thomaes die hont riquard standaerd hughe vanden hove jan die brune heinric die grote jan mont arnoud f heinemans gherard die weuel jan van caedsant hannot casekin wouter die vos gillis f wouters ende gherard die goes schepenne vanden vrien doen tewetene allen den goenen die dese lettren sullen zien jof horen lesen
</begin>
<main>
dat Cam vor ons Mester arnoud vanden groenendike canoenec van sint donaes in brucghe ende gaf wettelike ghifte als jn pure alemoesene broeder weitine porrewaghene mester vans heleghes ghests huis in brucghe als ten huis boef vorseid van achte linen lands lichtelic min jof meer licghende binden ambochte & in die prochie van lisseweghe nord oest vander kerke tusschen willems hondertmaerx ende hannekins wegs huis die welke achte linen lands vorseid willem hondert maerc heuet nu te Cense Vord so gaf mester arnoud vorseid wettelike ghifte den vorseiden mester vanden huis vorseid als ten huise boef in pure alemoesene vander rechter eltschede van zestiene linen lands lichtelic min jof me licghende binder prochie te stalhille ghemene met reinvarde porine streckende zudwaerd toter leed ende es gheheten die langhe nord hils Ende die vorseide mester arnoud vanden groenendike wedde den vorseiden mester vanden huis vorseid als ten vorseiden huise boef aldit vorseide land bede dat leghet binder prochie van lisseweghe ende vord binder prochie te stalhille vorseid tewetten tewaerne wech ende land ende quite land ten huise boef vorseid vrien eghindoeme jeghen elken mensche
</main>
<end>
Ende omme dat wie vorseide schepenne willen dat dese dinc vast ende ystade bliue ende wel ghehouden so hebben wie dese lettren te kennessen yseghelt met onsen zeghellen huthanghende Dit was ghedaen saterdaghes vor sinte marien magdalenen daghe anno domini M CC Nonogesimo
</end>