Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_18

<begin>
Wie roeger van ghistelle ruddre jan van poele gherolf van caluekete thomaes die hont hannot casekin willem van cleyhem heinric die grote oliuier vander haghe jan aket willem die corte Ende gheraerd die weuel schepenne vanden vrien doen tewetene alden goenen die dese lettren sullen zien jof horen lesen
</begin>
<main>
Dat cam vor ons boudene die brune f boudens brunen ende gaf wettelike ghifte Maergrieten siere moeder boudens brunen wedewe van dartiene ymete lands ende een alf ymet lands lichtelic min jof meer licghende van desen vorseiden lande vive ymete binden ambochte van jabbeke jn die prochie te stalhille te tveen sticken daer of dat men heet een stic onsbroec Ende dat ander stic die porcelle Ende viere ymete licghen in die prochie te varsenare die men heet die moer ende dat werf ende tanxins belc Ende viere ymete die licghen in die prochie te houtawe die heten waelhem Ende vord gaf hie hare wettelike ghifte van ere ofstede die leghet int ambocht te jabbeke bider kerke daer weitin f clais vp woent ende dat daer toe behord Ende dese bouden die brune vorseid wedde deser vorseider maergrieten siere moeder aldit vorseide land te wetten te waerne wech ende land ende quite land met alsulker scult alser vp staet ousbroec te haren rechten eghindoeme jeghen elken mensche
</main>
<end>
Ende omme dat wie vorseide schepenne willen dat dese dinc vast ende ghestade bliue ende wel ghehouden so hebben wie dese lettren te kennessen yseghelt met onsen zeghellen huthanghende Dit was ghedaen saterdaghes vor sinte marien magdalenen daghe anno domini M CC Nonogesimo
</end>