Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_22

<begin>
Wie roblot cant Ende jacob vinne scepenen in brucghe tien tiden dat dese dinc vor ons ghedaen was doen te wetene allen den goenen die dese lettren zullen zien iof horen lesen
</begin>
<main>
dat camen vor ons als vor scepenen jan van antoengen die men heet die baerdmakere Ende marote ziin wijf Ende Gauen halme ende wettelike ghijfte joes van cuertrike f Eliaes van cuertrike portere in brucghe van Enen huse staende buter vlamincporte naesten laurin vinnes huus was sonder een of nordalf vp veradelicen schinkels land ser woutersoete schinkels wedewe Ende andre diere toe behoren Ende van al datter Ertvast ende nagheluast an es Ende die vorseide jan van Antoengen Ende marote ziin wijf wedden ende beloveden dien vorseiden joes van cuertrike dit vorseide huus metal datter Ertvast ende nagheluast an es te wetten te waerne te zinen rechten Eghindome ieghen elken mensche vort so beloveden jan Ende marote ziin wijf vorseid dien vorseiden joes die hofstede daer dit vorseide huus vp staet te zuverne te scadelos te quitene van allen achterstelle van landcense toten daghe van heden vort so cam vor ons scepenen vorseid jacob van ghent Ende scald quite die besettinghe die hem jan Ende martote vorseid ghedaen adden vp dit vorseide huus als van hondert ponden vlaemscher peneghe te joes boef vorseid & vort al die macht ende al dat rechte dat hiere an hadde
</main>
<end>
Ende in kennessen van deser dinc dat wie vorseide scepenen willen dat alle dese dinghe die hier vorseid ziin bliuen vast ende ghestade so hebben wie dese lettren te kennessen vtanghende gheseghelt met onsen zeghellen dit was ghedaen in sinte jans daghe vtganghende hoest anno domini m cc nonogesimo
</end>