Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_23

<begin>
Wie oliuier vander haghe heinric die grote bouden f boudens riquard standaerd jan mont arnoud f heinemans Ende jan van caedsant schepenne vanden vrien doen tewetene allen den goenen die dese lettren sullen zien jof horen lesen
</begin>
<main>
dat camen vor ons Robrat van buchout trise sin wijf ende trise haer dochter ende gauen wettelike ghifte wouter f hannins f mijs van viere ymeten lands lichtelic min jof meer licghende binden ambochte & in die prochie te houtawe bewestalf ane pax stringhe & an die nordside tote den weghe duergaende Ende sie weddens hem die robret van buchout als portere jn brucghe & trise sin wijf & trise hare dochter den vorseiden wouter f hannins miis aldit lant vorseid tewetten tewaerne wech & lant & quite land met tveen peneghen vlamsche tsiars te sculden aldit vorseide land te sinen vrien eghindome jeghen elken mensche
</main>
<end>
Ende jn kennessen van deser dinc dat soe vast ende ystade bliue so hebben wie vorseide schepenne dese lettren yseghelt met onsen zeghellen huthanghende dit was ghedaen saterdaghes na sint gillis daghe anno domini M CC Nonagesimo
</end>