Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_24

<begin>
Diedric die vos Domaes die hond Jan van den zande Oliuier van der haghe heinric die grote Gherolf van caluekete boudene f boudens ende arnoud f heinemans wie Scepene van den vrien doen te wetene ende te verstane alden ghenen die dese lettren sullen sien jof horen lesen
</begin>
<main>
Dat quamen vor ons hannin van trenten ende adelise sijn wijf ende gauen vp broeder willem van caprike mester van sente jans huis jn brucghe sospitaels vrien eghindoeme boef van sente jans huis jn gherechter aelmoesene ende ter sustinanche van haren lechame zeuene ghemete lands lettel min jof lettel meer lecghende binden ambachten ende jn die prochien te suenkerke ende te lisweghe ende hier of so legheds sesse ghemete te suenkerke in ene ghebuerte die men heet trenten daer jan van trenten vorseid vp woende ende een ghemet leghets binne lisweghe in een stic van vier ghemeten an die westside ende vord gauen si hem vp als sospitaels huis boef vorseid al die husinghe staende vp al dit vorseide land ende si weddens al dit vorseide land ende wech ende land vri land ende quite land met sire rechter scult ende met alder husinghe der vp staende te wetten te waerne jeghen elken mensce te dis vorseid hospitaels vrien eghindoeme
</main>
<end>
Ende jn kennessen van deser dinc ende dat wie scepene vorseid willen dat si vast sijn ende ghestade bliuen so hebben wie dese lettren gheseghelt met onsen seglen vthanghende Dit was ghedaen tsaterdaghes na sente gillis daghe anno dominj millesimo Ducentesimo nonogesimo
</end>