Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_27

<begin>
Wie oliuier vander haghe gillis f diederix jan van lembeke arnoud f heinemans jan van caedsant gherard die goes Ende wouter die vos schepenne vanden vrien doen tewetene allen den goenen die dese lettren sullen zien jof horen lesen
</begin>
<main>
dat camen vor ons jan f gillis rabods ende maergriete sin wijf ende gauen wettelike ghifte jacob den tolnare van zeven linen lands lichtelic min jof meer licghende binden ambochte serwoutermans ende in die prochie te oudenburgh nordwaerd vander port oest over die zilinghe of sutalf onder heinekins f heinrix bongard Ende heet die strinc ende die vate Ende sie weddents hem al dit vorseide lant tewetten tewaerne wech ende land ende quite land te sinen vrien eghindoeme jeghen elken mensche Ende die jacob die tolnare vorseid gaf weder dien janne f gillis rabods ende maergrieten sinen wiue vorseid aldit vorseide land te Erfliken cense omme tvintich scheleghe goeder vlamscher peneghe elkes jaers tegheldene die ene elt telken sinte jans daghe mids somers ende die ander elt tegheldene telken sinte baues messe die dar naest comt met vullen cope ende met vulre versterfnesse als het auenture der of ghevallet
</main>
<end>
Ende in kennessen van deser dinc dat soe vast & ystade bliue so hebben wie vorseide schepenne dese lettren huthanghende yseghelt met onsen zeghellen dit was ghedaen vrindaghes vor sint denijs daghe anno domini M CC Nonogesimo
</end>