Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_28

<begin>
Jan mast willem van der lo weitin van der lo gillis die clerc oste vten broeke hughe van arsebroec boidin van den lene ende symoen van den houe wie schepenen van den siesseelschen doen tewetene allen den goenen die dese letteren zullen zien jof horen lesen
</begin>
<main>
dat cam voer ons in ghebanner virscarne van den siesseelschen clais die deken clais dekens sone & sprac daer toe te wetten dat jan van hontscote sate vp seven linen lands lettel me jof min & jn een huus & jn bomen staende vp dat selue vorseide land twelke vorseide land leghet binden ambochte van den ziesseelschen binder prochie van sinte pieters vpten dijc & jn steden tusschen den timpelhoue & daer clais van sceepstale woent & clais de deken vorseit heschede janne van hontscote vorseit dat hie sate vp dit vorseide land & jn huse & jn bomen vorseit met sinen onrechte & sonder hure & sonder sens & toghede dat dat selue goed hem verstoruen ware & sire moeder & sinen broederen & sinen susteren van claise den deken sinen vader & begherde datter jan van hontscote vorseit and of dade & dat hiet rumede & liets hem ghebruken over sijn al egine goed & daer was jan van hontscote ghewijst tedaghene bi wetten & bi vonnessen van schepenen vorseit terechte testane vpten naesten dinghedach jeghen claise den deken vorseit & daer was jan van hontscote vorseit wettelike ghedaghet & vpten naesten dingedach cam clais de deken in ghebanner virscarne van den ziesseelschen & begherde dat men vord heschen soude janne van hontscote vorseit & daer was hie vord iheschet wettelike & daer gaf clais de deken janne van hontscote den seluen heesch die hier vorseit es & daer cam dere jan van ysendike ente here jan de bardmakere procurerres sabs & scouents van den Echoute jn brugghe & spraker toe te wetten & vermaten hem helpe an schepenen vorseit dat clais de deken de houde adde ghecalengierd al dit vorseide goed vp tiden die verleden waren & dat sie dat selue land & huse & bome vorseit adden behouden bi wetten & bi vonnessen van schepenen vorseit jeghen clais den deken den ouden over are al eghine goed sabs boef & scouents boef vorseit & so varre spraker siere daer toe tewetten jeghen claise den deken den jonghen dat bider vermetelheide & bider kennesse die sies daer adden & bi wetten & bi vonnessen van schepenen van den ziesseelschen vorseit dit vorseide lant & huse & bome vorseit hemleden was ghewist tebehoudene over arleder al egine goed sabs & scouents boef van den echoute vorseit
</main>
<end>
Ende jn kennessen van deser dinc & dat wie schepenen vorseit willen dat al vast ende ghestade ghehouden bliuet so hebben wie dese letteren gheseghelt met onsen zeghelen vithanghende Dit was ghedaen sdinxendaghes voer sinte luex daghe anno domini m cc Nonogesimo
</end>