Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_29

<begin>
Wie hughe vanden hove jan vanden zande jan die brune heinric die grote wenin van varsenara willem die corte Ende willem die scoutete schepenne vanden vrien doen tewetene allen den goenen die dese lettren sullen zien jof horen lesen
</begin>
<main>
dat camen vor ons willem die madre & aghete sin wijf ende gauen wettelike ghifte heinrike f boudens van dardalf line lands lichtelic min jof me licghende binder prochie te dudsele oest waerd vander kerke ende of oestalf an jans f reinaers lande vten hemme ende heet paridaens werf ende sie weddens hem aldit vorseide land tewetten tewaerne wech & land & quite land te sinen vrien eghindome jeghen elken mensche Ende dese heinric f boudens vorseid gaf weder willemme den madre ende agheten sinen wiue aldit vorseide land te Erfliken cense omme viue scheleghe tsiars goeder vlamscher peneghe tegheldenne telken sinte bamesse Ende coep ende versterfnesse ghelijc den cense als auenture der of ghevallet
</main>
<end>
Ende in kennessen van deser dinc dat soe vast & ystade bliue so hebben wie vorseide scepenne dese lettren yseghelt met onsen zeghellen vthanghende dit was ghedaen vrindaghes na sinte luix daghe anno domini M cc Nonogesimo
</end>