Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_3

<begin>
VUoutre van ghent ruddre Gherolf van caluekete Jan die brune Oliuier van der haghe Alard f mijns here storems Jan mont Gherard die goes ende woutre die vos wie Scepene van den vrien doen te wetene ende te verstane alden ghenen die dese Lettren zullen sien jof horen lesen
</begin>
<main>
dat quamen vor ons hanne boestenare ende magriete sijn wijf ende gauen wettelike ghifte weitine van der Cruce van een haluen Ghemete Lands lettel min jof lettel me lecghende Binden ambachte ende jn die prochie van clemskerke daer dese vorseide hanne die boestenare vp woent Ende si weddens hem al dit vorseide land wech ende land vri land ende quite land ende sonder scult te wetten te waerne jeghen elken mensce te sinen rechten eghindoeme dis weitins vorseid Ende vort weitin van der cruce vorseit ende magriete sijn wijf gauen wedere hannen den Boestenare ende magrieten sinen wiue dit vorseide land tenen Aerueliken chense omme Tien sceleghe siars vlaemscer peneghen ende dien chens te gheldene te Elken sinte martins messe elx jaers met enen pond was te cope ende te versternesse
</main>
<end>
Ende jn kennessen van deser dinc ende dat wie Scepene vorseid willen dat si vast sijn ende Ghestade bliuen so hebben wie dese lettren Gheseghelt met onsen seghelen vthanghende Dit was ghedaen tsaterdaghes vor onser vrouwen dach ter lichtmesse jnt jaer ons heren als men Screef sijn jncaernatioen Millesimo Ducentesimo Octogesimo Nono
</end>