Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_30

<begin>
Wie jhan van poele diederic die vos reinvaerd porin willem van cleyheem gherolf van Caluekete weinin van varsnare doemaes die hont olivier vander haghe jhan vanden zande heinric die grote bouden van moerkerke gheraerd die goes gheraerd die weuel alaerd f sere huyghes storems ende jhan aket scepenen vanden vrien doen te wetene alle den gonen die dese letteren sullen sien ende horen lesen
</begin>
<main>
dat camen vore ons meester niclais balde ende heilsoete siin wiif ende gauen wettelike ghifte gheraerd f pieters beyoens van dardaluen ymeten lands lichtelic min of meer legghende binden ambochte ende binder prochien te oostkerken te wetene dat es die hofstede daer hie meester niclais vorseid vp woent ende een ander stic lands dat hie cochte jeghen enen wouter den bus ende een stic lands dat men heet meester niclais houekin ende het leghets een vierendeel ymets lands lichtelic min of meer van desen vorseiden lande benord half andit vorseide houekin ende het leghets ene line lands ende dartich roeden lands lichtelic min of meer van desen vorseiden lande streckende boostalf daer clais f gheilen woent ende wilke land meester niclais vorseid cochte jeghen enen lambracht den scouthete vri land quite land ende wech ende land ende sie weddes hem te wetten te waerne jeghen elken mensche te dis vorseids gheraerds f pieters vrien eghindoeme ende vort quam vore ons scepen vorseid gheraerd f pieters vorseid ende gaf weder meester niclaise balden ende heilsoeten sinen wive al dit vorseide lant tenen aerveleken zense omme drie pont goeder vlaemscher peneghen elx jaers ende desen vorseiden sens te gheldene dene helt te half maerthe die eerst coemt ende die ander helt te gheldene te sinte maertins messe die daer naer eerst coemt elx jaers met tvintich sceleghen goeder vlaemscer peneghe te cope ende te versterfnessen alst ghevalt
</main>
<end>
ende omme dat wie willen dat dese ding si vast ende ghestade blive so hebben wie scepen vorseid jn kennessen dese letteren ghezeghelt met onsen zeghelen vuthanghende Dit was ghedaen saterdaghes vore alre heleghen daghe anno domini m cc nonogesimo
</end>