Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_31

<begin>
Wie bouden dyserin ruddre reinvaerd porin jan van caedsand jan die brune weynin van varsenare heinric die grote jan aket willem van kleihem Ende jan van woemen scepenen vanden vrien doen tewetene allen den goenen die dese lettren zullen zien iof horen lesen
</begin>
<main>
dat Cam vor ons maergriete boudens brunen wedewe porticghe in brucghe Ende gaf wettelike ghijfte willemme bette te ser pouwels Calkers boef portere in brucghe van dartiene ymete ende een half ymet lands lettel min iof me van desen vorseiden lande so licghents vijf ymete lands binden ambochte van iabbeke ende in die prochie te stalhille te tveen sticken daer of dat men heet een stic onsbroec ende dat ander stic die porcelle ende viere ymete ende een half ymet lands lettel min iof me licghen in die prochie te varsenare die men heet die moer ende tverf ende tancsins belc Ende viere ymete lands licghen in die prochie te houtawe in ene stede heet waelhem Ende margriete vorseid wedde willem vorseid al dit vorseide land wegh ende land ende quite land te wetten tewaerne met siere rechter sculd diere vp staet te ser pouwels calkers vorseid rechten eghindome boef ieghen elken mensche
</main>
<end>
Ende in kennessen van deser dinc dat wie vorseide scepenen willen dat soe vast ende ghestade bliue so hebben wie dese lettren te kennessen vtanghende gheseghelt met onsen zeghellen dit was ghedaen saterdaghes na alre heleghen daghe anno domini m cc nonogesimo
</end>