Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_33

<begin>
Wie andries die ruddre Ende jacob lam schepenne in brucghe tien tiden dat dese dinc vor ons ghedaen was doen tewetene allen den goenen die dese lettren sullen zien jof horen lesen
</begin>
<main>
dat cam vor ons dere Niclais Cleinsmit Capellaen van sinte Carstoffers in brucghe ende gaf vp mester gherarde van oupi Canoenec van sint donaes jn brucghe als ter Capitelle boef van sint donaes vorseid aldie macht & aldat recht ende aldat deel dat hie hadde an al die husinghe staende bachten sgraven stene & tusschen den stene ende der roye vpter vorseider kerke land van sint donaes & hie weddets hem tewetten tewaerne ter vorseider Capitelle vrien eghindome jeghen elken mensche
</main>
<end>
Ende in kennessen van deser dinc dat soe vast ende ystade bliue So hebben wie vorseide schepenne dese lettren yseghelt met onsen zeghellen dit was ghedaen dundersdaghes vor sinte Clements daghe anno domini M CC Nonogesimo
</end>