Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_35

<begin>
jjserin weuel Wie bouden dyserine wouter van esine rudders thiederic die vos heinric die grote domaes die hont heinric scaefscacht jan aket arnoud f heinemans gherard die wevel & jan van tardendike schepenne vanden vrien doen tewetene allen den goenen die dese lettren sullen zien jof horen lesen
</begin>
<main>
dat camen vor ons lammin van trenten marie sin wijf ende clemme f lammins van trenten ende gaven wettelike ghifte broeder willemme van caprike mester van sint jans huis jn brucghe te sint jans huis boef als in rechten wisselle van vive ymeten lands ende tve linen lands lichtelic min jof meer licghende binden ambochte & in die prochie van zuwenkerca oest over den dyc daer hannin van trenten & roebin sin broeder bi woenden ende sie weddens broeder willemme mester vanden huis vorseid aldit vorseide land tewetten tewaerne wech & land & quite land ten huis boef van sint jans huis vorseid vrien eghindome jeghen elken mensche
</main>
<end>
Ende in kennessen van deser dinc dat soe vast & ystade bliue so hebben wie vorseide schepenne dese lettren yseghelt met onsen zeghellen vthanghende Dit was ghedaen jn sinte catelinen daghe anno domini M cc Nonogesimo
</end>