Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_36

<begin>
Wie Domaes die hont Jhan die brune Oliuier van der haghe heinric die Grote weinin van varsenare willem die corte hughe van den houe alard storem ende wouter die vos scepen van den vrien doen te wetene alle den Ghenen die dese letteren sullen sien ende horen lesen
</begin>
<main>
dat cam vor ons heilote heinric heinrix soens dochter ende Gaf vp in pure alemoesenen broeder willemme van sente claren der abedessen ende scouuents bouf van sente claren bi Brucghe drie ende twintich jmete lands lettel min of me van den welken leghets twellef jmete bin der prochie van vlissenghem benorder kerke ende boesten weghe noch binden seluen ambochte twe Ghemete daer crunbeen woende noch binden seluen ambochte vijf jmete dat men heet fais stic Ende noch binden ambochte ende binder prochien van niemonstre viere Ghemete boeste der prekelinghe benorden weghe al dit vorseide lant vri lant ende quite lant sonder die twe Ghemete vorseit die ghelden achte ende tvintich peneghe vlaemsch jn mijns here ihan tobbins brieue ende coep ende versterfnesse van enen pont was alst Gheuallet Ende die vorseide heilote Gaf broeder willemme vorseit wettelike Ghifte der abedessen ende scouuents bouf vorseit van al desen vorseiden lande ende weddets hem te wetten te waerne wech ende lant quite lant met der vorseider scout der abedessen ende couents vorseit vrien Eghindoeme
</main>
<end>
Jn kennessen van welker dinc wie hebben dese letteren beseghelt met onsen zeglen vthanghende Dit was ghedaen saterdaghes vor sente Niclawes dach anno domini m cc nonagesimo
</end>