Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_5

<begin>
Woutre van koekelare Ruddre Jan van poele Diedric die vos willem f alards Gillis f diedrix willem van cleyhem Gherolf van caluekete boudene f boudens arnoud f heinemans gherard die goes ende jan mond wie Scepene van den vrien doen te wetene ende te verstane alden ghenen die dese lettren sullen sien jof horen lesen
</begin>
<main>
Dat quam voer ons oem willin ende gaf wettelike Ghifte ver lempen hughe wits wedewe van den knive van ere line lands dartiene roeden lands min lichtelic min jof me lecghende binden ambachte van dudsele ende jn sinte Gillis prochie ende heet machen land ende hi weddeds al dit vorseide land wech ende land vri land ende quite land Eghin land ende sonder scult te wetten te waerne jheghen Elken mensce te haren rechten eghindoeme deser ver lempen vorseid Ende ver lempe hughe wits wedewe vorseit die gaf wedere oem willine al dit vorseide land tenen aerveliken chense omme twe sceleghe goedere vlaemscer peneghen te gheldene elx jaers ende dien chens te gheldene te elken sinte jans daghe jn middels somers elx jars
</main>
<end>
Ende jn kennessen van deser dinc ende dat wie scepene vorseid willen dat si vast sijn ende ghestade bliuen so hebben wie dese lettren gheseghelt met onsen seghelen vt hanghende Dit was ghedaen tsaterdaghes Na jngaende maerte Jnt jaer ons heren als men screef sijn Jncaernatioen millesimo Ducentesimo Octogesimo Nono
</end>