Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_6

<begin>
Wie wouter van esene ruddra gillis f domini hughes oliuier vander haghe domaes die hont hannot casekin jan aket gillis f wouters gheraerd die goes hughe vanden hove ende wouter die vos scepenen vanden vrien doen te wetene allen den goenen die dese lettren zullen zien iof horen lesen
</begin>
<main>
dat cam vor ons wouter f wouters vander scoere ende machtild ziin wijf Ende gaven wettelike ghijfte janne den klerc van enen ymete ende een alf ymet lands lichtelic min iof me licghende binden ambochte ende in die prochie van moerkerke tere stede die men heet te poelhoeke ende es daer wouter vorseid vp woent ende sie weddents hem al dit vorseide land wegh ende land ende quite land te wetten te waerne te zinen rechten eghindome jeghen elken mensche ende jan die klerc vorseid gaf weder wouter f wouters ende machtilde zinen wiue vorseid al dit vorseide land te erfliken cense omme tvintich scheleghe goeder vlaemscher peneghe elkes jaers te gheldene telken sinte baues daghe sonder coop & sonder versterfnesse & jan die klerc vorseid gaf vp tobbine paiemente al die macht & al dat rechte dat hie adde ant land ende an die rente tsiaers vorseid te zinen rechten eghindome
</main>
<end>
Ende in kennessen van deser dinc dat wie vorseide scepenen willen dat soe vast ende bliue so hebben wie dese lettren te kennessen vtanghende gheseghelt met onsen zeghellen dit was ghedaen saterdaghes vor sinte gregoris daghe anno domini m cc lxxx nono
</end>