Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_7

<begin>
Wie jhan van poele Gherolf van caluekete willem van wateruliet jan vanden zande jhan brune reinvard porin ende gherard die goes scepenen vanden vrien doen teverstane allen den goenen die dese lettren sullen sien ende horen lesen
</begin>
<main>
Dat quam vore ons vrouwe margriete min seren adaems wedewe van caluekete ende gaf wettelike ghifte gherarde f pieters beyoens van enen ymete lands lichtelic me of min licghende binder prochie van dudsele daer boudene witstard vp woent Ende daer vt gaet dat twelfste deel Ende vort gaf soe wettelike ghifte van drie virendele ymete lands lichtelic me of min licghende binder prochie vorseid dat lammin f aghaten noet ende daer vt so gaet echt dat twelste dele ende soe weddet hem te wette tewaerne wech ende land quite land ende sonder scult te dis gherards f pieters vorseid vrieghindomme jeghen elken mensche
</main>
<end>
ende jn kennesse van desen sticken dat sie vast bliuen ende ghestade hebben wie vorseide scepenen dese lettren vthanghende gheseghelt met onsen zeghellen dit was ghedaen saterdaghes vore half marthe anno domini m cc lxxx nono
</end>