Compilatiecorpus Historisch Nederlands 1.0 (CHN): ambtelijke teksten 1250-1800: brugge_1290_9

<begin>
Allen den gonen die dese letteren sullen zien jof horen lesen Doen te wetene wie Abbet vander does Abbet van sinte andries Bi Brigghe Meester cristiaen de svarte deken vander karstineed van brigghe Ende broeder zegher van louendengheem prior vanden predecaers van brigghe Dat wie hebben ghesien sarters die de abbet ende tcouent vanden echoute van brigghe hebben ghegheuen den meesten couente vanden beggarden te brigghe vanden hofsteden ende vanden lande die de vorseide beggharde besitte & censen tjeghen dien vorseiden abbet & den couente vanden echoute niet ghequetst no afghedaen no toeghedaen no ghecanceleerd in enigher stede in dese vorme Allen den gonen die dese lettren sullen zien ende horen lesen Doen te verstane
</begin>
<main>
wie Abbet ende couent van den echoute in brigghe Dat wie hebben igheuen ten beggharden te hebbene ende te houdene van ons in eueleken chense onse land Dit es te wetene die ofstede die wouter van varsenare ende die ofstede die heinric van bredenay beggharde ende die ofstede die godelief vander steenstrate ende die ofstede die clare vanden hoye hilden van ons ende elkerlijc van hem ouer hem zeluen in chense daer die vorseide beggarde vp wonen ende hebben behuust ende bepaelt ligghende buten sinte marien brugghe inden cuertrike wech af westalf ande strate tusschen lysebetten warregarens hofstede af noort alf vanden voerseiden lande ende tusschen margrieten jans witten dochter hofstede af zuuthalf Tuilke voerseide land strecht achterwaerd tote der strate diemen heet nieweland ligghende tusschen erenbouds guters hofstede af noorthalf ende ghyselins kindre vanden moere hofstede af zuidthalf Ende dit vorseide land hebben zie ende houden omme den chens va zes ponden vlaemschs payments te gheldene elcs jaers ewelike te teween terminen binnen den jare Dit es te verstane dene helt vanden ghelde sint jans messe mids somers ende een pond pepers ende dander helt te medewintere ende oec daer toe zes ponde was ende oec wllen coep ende versteruenesse zo wilken tiden dat die gone steruet die in brieue staet ouer hoft vanden couente der voorseider beggharden Ende emmer moeter een vanden zeluen couente staen bescreuen in hoefde Bi desen voorseiden voorworden hebben si orlof van ons te te makene ende te doen makene al hare ghevoech bede houtin ende stenin na haren wille binnen den palen vanden vorseiden lande Ende oec hebben zie orlof ende macht dit land te splitene ende te gheuene in hofsteden tote in tween jof in drien zonder meer int west ende van desen vorseiden lande also langhe als zie daer vp wonen ende houden couent Ende ghevielt hier naer dat zie die beggharde wilden varen wonen in andrem steden binden scependoeme van brugghe ende zie hem verdroeghen hare woenste ende hilden couent in steden daer zi hem verdroeghen ende si wilden vercopen die voorseide huusinghe die staen vp onse land ende zie die huusinghem vercochten so souden zie ons gheuen onsen vullen coop Ende die gone die die huusinghe coept ende na hemleden coemt vp dat land hi sal houden van ons al dat land binnen den vorseiden palen tere hofstede al ware dat sake dat zie die beggharden dat voerseide land daer te voren hadden ghespleten in tveen hofsteden jof in meer ende omme den zeluen chens dat die beggharden hilden ende in andren manieren niet ende es oec te wetene dat sie die beggarden hem verdroeghen in andren steden te wonne jof dat si hem verscieden onderlanghe so datter ne waer twe vp dat onse land voerseid ne bleuen te wonne alse in couente so soude dit voerseide land metten huusinghen diere vp staen weder toe comen tonser voerseider kerke los ende quite van allen voerworden die hier sijn voerscreuen
</main>
<end>
Ende omme dat wie willen dat dese voerseide dinghen bliuen vast ende ghestate so hebben wie tekennessen vander wareit ende te eeweliker ghedinkenesse onse zeghele ghehanghen an dese leteren Dit was ghedaen int jaer der incarnatie ons heren als men screef duzentich tveondert tachtentich ende drie jnganghende octobre Ende in orconscepen dat wie desen tsarter zaghen in deser maniere ende in dese vorme als hier voerseid es so hebben wie dese letteren gheseghelt met onsen zeghelen Dit was ghedaen ende ghescreuen int jaer der incarnatie ons heren als men screef duzentich tveondert ende neghentich na alf april
</end>