Compilatiecorpus Historisch Nederlands 1.0 (CHN): ambtelijke teksten 1250-1800: brugge_1309_1

<begin>
WJE Scepenen ende ghemeentucht vander stede van brucghe doen te wetene allen den ghonen die dese letteren zullen zien jof horen lesen
</begin>
<main>
dat wie omme de nood van onser stede van brucghe hebben vercocht onsen lieuen vrienden hannekine callekine ende grielkine jans kindere van atrecht die hi hadde bi marien jacobs bodekijns dochter souden vichtien pond vlaemsche jaerlixer renten te haerrer drier liue omme ene benaemde zomme van peneghen die zie ons van haren propren cateilen in goeden ghereeden peneghen wel ende vulcomenlike hebben vergolden ende die wie van hemlieden hebben ontfanghen ende bekeerd jn die openbare nutscepe ende orebare van onser voerseider stede van brucghe De welke vichtien pond vlaemsche jaerlixer renten wie belouen alle ende elc zonderlanghe van ons allen ouer al in goeder trouwen dat wiese hannekine callekine ende grielkine vorseid jof enighen van hem drien die lanxt leuen zal jof haren zekeren bode jof den bode van enighen van hem drien die lanxt leuen zal zullen ghelden jof doen ghelden binder stede van brucghe elkes jaers also langhe als zie leuen jof enich van hem drien leuet te tween paiementen euengroten dats te wetene zeuen pond ende tien schelighe vlaemsche jn sinte jans baptists daghe mids zomers die eerst coomt nader date van desen letteren Ende zeuen pond ende tien schelighe jn kerst daghe daer naer eerst comende Ende also vort dievoerseide vichtien pond vlaemsche jaerlixer renten elkes jaers van jare te jare also langhe alse hannekijn callekijn ende grielkijn jof enich van hemlieden voerseid lijf hebben in haren lachame jn zo wat state van leuene dat zie zijn ende in zo wat abite ende zo waer dat zie hem bekeeren ende betrecken es het in religione jof ter werelt ten tween voerseiden terminen ende paiementen Ende tenden haren liuen als zie alle drie dood worden zo zullen wie zijn quite los ende ledich van dien voerseiden vichtien ponden vlaemsche jaerlixer renten te gheldene tieghen hannekijns callekijns ende grielkijns hoir voerseit ende tieghen elken andren mensche Ende alle dese voerseide dinghen ende elke zonderlanghe zo belouen wie alle ende elc zonderlanghe van ons allen ouer al dat wiese hannekine callekine ende grielkine voerseid zullen houden ende doen houden wel ende ghetrouwelike ende dat wiere ons in gheere maniere jeghen zullen zetten omme enighe dinc die ghevuallen zi jof die gheuallen moghen Ende hier toe zo binden wi ons allen ende elken zonderlanghe van ons allen ende alle de ghone die na ons comen zullen Scepenen ende ghemeentucht vander voers[eid]er stede van brucghe Ende renuntieren oec als hier toe talle priuilegien ende indulgentien ghimpetrert ende timpetrerne tallen rechten beede bescreuen ende onghescreuen vander heligher kerke ende vander werelt tallen letteren voersten ende gracien van zo wien dat zie ghegheuen zijn jof ghegheuen moghen worden Es het vanden paues van rome jof vanden Coninc van vrankerike jof van enighen andren prense Ende tallen andren voerd[eelen] [die] ons ende onser voerseider stede van brucghe mochten comen te helpen ende te baten ende hannekine jof callekine jof grielkine jof haren bode [voer]seid te deren [ende] [te] [scaden]
</main>
<end>
[Ende] omme dat wie willen dat dese dinc zi vast ende ghestade zo hebben wie scepenen vd voerseit in orconscepen van der welker dinc dese huut[hanghende] [letteren] ghedaen zeghelen metter stede zeghele van brucghe Dit was ghedaen jnt jaer ons heren als men screef van sinen jncarnatione Dusentich Driehondert ende Neghene jn die maen[d] van SEPTEMBRE
</end>