Compilatiecorpus Historisch Nederlands 1.0 (CHN): ambtelijke teksten 1250-1800: brugge_1309_2

<begin>
WJE Scepenen ende ghemeentucht vander stede van brucghe doen te wetene allen den ghenen die dese letteren zullen zien jof horen lesen
</begin>
<main>
dat wie omme de nood van onser stede van brucghe hebben vercocht onsen lieuen vrienden heilsoeten van huutkerken ende grielen haerre dochter die soe hadde bi jacob beyne vijf pond vlaemsche jaerlixer renten te haerre beeder liue omme ene benaemde somme van peneghen die zie ons van haren propren cateilen in goeden ghereeden peneghen wel ende vulcomenlike hebben vergolden ende die wie van hemlieden hebben ontfanghen ende bekeerd in die openbare nutscepe ende orebare van onser voerseider stede van brucghe De welke vijf pond vlaemsche jaerlixer renten wie belouen alle ende elc zonderlanghe van ons allen ouer al in goeder trouwen dat wise heilsoeten ende grielen haerre dochter voerseid jof enighen van hem beeden die lanxt leuen zal jof haren zekeren bode jof den bode van enighen van hem beeden die lanxt leuen zal zullen ghelden jof doen ghelden binder stede van brucghe elkes jaers also langhe als zie leuen jof enich van hem beeden leuet te tween paiementen euengroten dats te wetene vichtich schelighe vlaemsche jn sinte jans baptists daghe mids zomers die eerst coomt nader date van desen letteren ende vichtich scelighe vlaemsche jn kerst daghe daer naer eerst comende Ende also die voerseide vijf pond vlaemsche jaerlixer renten elkes jaers van jare te jare also langhe alse heilsoete ende griele voerseid lijf hebben in haren lachame jn so wat state van leuene dat zi sijn ende so wat abite ende so waer dat sie hem bekeeren ende betrecken es het in religione jof ter werelt ten tween voerseiden terminen ende paiementen Ende tenden haren liuen als zie beede dood worden zo zullen wie zijn quite los ende ledich van dien voerseiden vijf ponden vlaemsche jaerlixer renten te gheldene tieghen heilsoeten ende grielen hoir voerseid ende tieghen elken andren mensche Ende alle dese voerseide dinghen ende elke zonderlanghe zo belouen wie alle ende elc zonderlanghe van ons allen ouer al dat wise heilsoeten ende grielen voerseid zullen houden wel ende ghetrouwelike ende doen houden ende dat wiere ons in ghere maniere tieghen zullen zetten omme enighe dinc die gheuallen zi jof die gheuallen moghen Ende hier toe so binden wi ons allen ende elken zonderlanghe van ons allen ende alle deghene die na ons comen zullen Scepenen ende ghemeentucht vander voer seider stede van brucghe Ende renuntieren oec als hier toe tallen priuilegien ende indulgentien gheimpetrert ende timpetrerne tallen rechten beede bescreuen ende onghescreuen vander heligher kerke ende vander wereld tallen letteren voersten ende gratien van so wien dat zi ghegheuen zijn jof ghegheuen moghen worden Es het vanden paues van rome jof vanden Coninc van vrankerike jof van enighen andren prense ende tallen andren voerdeelen die ons ende onser voerseider stede van brucghe mochten comen te helpen ende te baten ende heilsoeten jof grielen jof haren bode voerseid te deren ende te scaden
</main>
<end>
Ende omme dat dese dinc zi vast ende ghestade so hebben wie scepenen voerseid jn orconscepen van der welker dinc dese huuthanghende letteren ghedaen zeghelen metter stede zeghele van brucghe Dit was ghedaen jnt jaer ons heren als men screef van sinen jncarnatione Dusentich Driehondert ende Neghene jn de maend van septembre
</end>