Compilatiecorpus Historisch Nederlands 1.0 (CHN): ambtelijke teksten 1250-1800: brugge_1311_1

<begin>
WJE Schepenen ende ghemeentucht vander stede van brucghe doen te wetene ende maken cont allen lieden
</begin>
<main>
dat wie omme den noot ende die ghemeene nutscepe van onser stede van brucghe vorseit hebben vercocht Onser lieuer vriendinnen in gode Maertinen laurens dochter van coekelare sbakers die hi hadde bi marien sinen wiue twe ende dartich sceleghe vlaemsche jaerlixer renten te haren liue omme ene benaemde somme van peneghe die soe ons van haren propren cateilen in goeden ghereeden peneghen wel ende vulcomenlike heuet vergolden ende die wie van hare hebben ontfanghen ende bekeert jn die openbare nutscepe ende orbare van onser vorseider stede van brucghe die welke twe ende dartich sceleghe vlaemsche jaerlixer renten wie belouen alle ende elc zonderlanghe van ons allen oueral jn goeder trouwen dat wiese Maertinen vorseit jof haren zekeren bode zullen ghelden jof doen ghelden binder stede van brucghe vorseit elkes jaers also langhe als soe leuet te tween payementen euen gr[o]ot dats tewetene zestiene sceleghe vlaemsche jn kers daghe die erst comt na der date van desen letteren ende zestiene scheleghe vlaemsche jn sinte jans baptists daghe mids zomers daer naer erst comende ende also vort die vorseide twe ende datich sceleghe vlaemsche jaerliker renten elkes jaers van jare te jare te gheldene inder vorseider manieren also langhe als Maertine vorseit lijf heuet in haren lichame jn zo wat state van leuene dat zoe zi ende in zo wat abite ende zo waer dat zoe hare bekeert ende betrecket eist in religioene jof ter werelt Ende tende haren liue als zoe Maertine doot wort zo zullen wie quite zijn los ende ledich van den vorseiden twe ende dartich sceleghen vlaemsche jaerlixer renten te gheldene tjeghen Maertinen hoir vorseit ende ieghen elken andren mensche Ende alle dese vorseide dinghen ende elke zonderlanghe zo belouen wie alle ende elc van ons zonderlanghe ouer al dat wise Maertine vorseit zullen houden ende doen houden wel ende ghetrouwelike ende dat wiere ons in neghere manieren jeghen zullen z[e]tten omme enighe dinc die ghevallen zi jof die ghevallen moghe Ende hier toe zo binden wi ons allen ende elken van ons zonderlanghe ende alle die ghone die na ons comen zullen Schepenen ende ghemeentucht vander vorseider stede van brucghe ende renuntieren oec als hier toe tallen priuilegien ende jndulgentien gheimpetrerd ende te impetreerne tallen rechte bede bescreuen ende ombescreuen vander heligher kerke ende vander werelt tallen letteren voersten ende gratien van zo wien dat zi ghegheuen zijn jof ghegheuen mochten worden eist vanden Paues van Rome jof vanden Coninc van vrankerike jof van enighen andren prince ende tallen andren vordeelen die ons ende onser vorseider stede van brucghe mochten comen te helpen ende te baten ende Maertinen jof haren bode vorseit te deeren ende te scaden
</main>
<end>
Ende omme dat wie willen dat dese dinc also hier vorseit es zi vast ende ghestade zo hebben wie scepenen vorseit jn orconscepe van der welker dinc dese letteren ghedaen zeghelen huuthanghende metter stede zeghe van brucghe vorseit Dit was ghedaen int jaer ons heren als men screef van sinen jncarnatioene dusentich driehondert ende elleuene Smaendaghes na sinte marien magdalenen daghe voren oest
</end>