Compilatiecorpus Historisch Nederlands 1.0 (CHN): ambtelijke teksten 1250-1800: brugge_1311_2

<begin>
WJE Schepenen ende ghemeentucht vander stede van brucghe doen te wetene ende maken cont allen lieden
</begin>
<main>
dat wie omme den noot ende die ghemeene nutscepe van onser stede van brucghe vorseit hebben vercocht onser lieuen vrient gheraerde den smoutere filius gheraerd smouters viue ponden vlaemsche jaerlixer renten te sinen liue omme ene benaemde somme van peneghen die hie ons van sinen propren catheilen in goeden ghereeden peneghen wel ende vulcomenlike heuet vergholden ende die wie van hem hebben ontfanghen ende bekeert in die openbare nutscepe ende orbare van onser vorseider stede van brucghe die welke viue pond vlaemsche jaerlixer renten wie belouen alle ende elc zonderlanghe van ons allen ouer al in goeder trouwen dat wiese gherarde den smoutere vorseit jof zinen zekeren bode zullen ghelden jof doen ghelden binder stede van brucghe vorseit elkes jaers also langhe als hie leuet te tween paiementen euen groot dats tewetenen victich scheleghe vlaemsche jn kers daghe die erst comt na der date van desen letteren ende vichtich sceleghe vlaemsche jn sinte jans baptists daghe mids zomers daer naer erst comende Ende also vort die vorseide viue pond vlaemsche jaerliker renten elkes jaers van jare te jare te gheldene inder vorseider manieren also langhe als gheraerd vorseit liif heuet in zinen lechame jn zo wat state van leuene dat hi zi ende in zo wat abite ende zo waer dat hie hem bekeert eist in religioene jof ter werelt te tween vorseiden terminen ende payementen Ende tenden sinen liue als hi doot wort zo zullen wie quite ziin los ende ledich van den vorseiden viue ponden vlaemsche jaerlixer renten te gheldene tieghen gheraerd hoir vorseit ende ieghen elken andren mensche Ende alle dese dinghen ende elke zonderlanghe zo belouen wie alle ende elc van ons zonderlanghe ouer al dat wiese gheraerd vorseit zullen houden ende doen houden wel ende ghetrouwelike ende dat wiere ons in neghere manieren ieghen zullen zetten omme enighe dinc die gheuallen zi jof die ghevallen moghen Ende hier toe zo binden wi ons allen ende elken van ons zonderlanghe ende alle die ghone die na ons comen zullen Schepenen ende ghemeentucht vander vorseider stede van brucghe Ende renuntieren oec als hier toe tallen priuilegien ende indulgentien gheimpetreerd ende te impetreerne tallen rechten bede bescreuen ende ombescreuen vander helegher kerke ende vander werelt tallen letteren voersten ende gratien van zo wien dat zi ghegheuen ziin jof ghegheuen mochten worden eist vanden paues van Rome jof van den Coninc van vrankerike jof van enighen andren prince ende tallen andren vordeelen die ons ende onser vorseider stede van brucghe mochten comen te helpen ende te baten ende gheraerd vorseit jof zinen bode te deeren ende te scaden
</main>
<end>
Ende omme dat wie willen dat dese dinc also hier vorseit es zi vast ende ghestade zo hebben wie Schepenen vorseit jn orconscepe vander welker dinc dese letteren ghedaen zeghelen huuthanghende metter stede zeghele van brucghe vorseit Dit was ghedaen jnt jaer ons heren als men screef van sinen jncarnatioene dusentich driehondert ende elleuene smaendaghes na sinte marien magdalenen daghe voren oest
</end>