Compilatiecorpus Historisch Nederlands 1.0 (CHN): ambtelijke teksten 1250-1800: brugge_1342_1

<begin>
WJE Jan vanden moenstre Ende boudin van zomergheem scepenen Jn brucghe in dien tiden dat dese dinghen vor ons waren ghedaen doen te wetene allen den ghuenen die dese letteren zullen sien iof horen lesen
</begin>
<main>
dat camen vor ons alse vor scepenen ver cateline van edenhackere ende bazelis haer zuene ende wedden ende beloueden vp den baerblikensten van hem beden ende elc ouer al roegiare omare te grielekins bouf Marie baderans kinde dat zoe hadde bi janne van broukeem vichtich sceleghe grote tornoyse iof die waerde daer ouer in anderen payemente te gheldene dese vorseide peneghen ten wille ende ten vermaenne van roegiare vorseid Ende hier bi zo sullen ver cateline van edenhackere vorseit ende de vorseide bazelis haer zuene met hem lieden houden dit vorseide kint ende hem gheuen eten drinken cledren cousen ende scoen ende al dat te sinen lachame toebehoeren zal tameleke ende weseleke also langhe als zieleden dese vorseide peneghen onder hemlieden ende in haerlieder handen hebben zullen zonder minderinghe van desen vorseiden peneghen
</main>
<end>
Jn kennessen van desen dinghen hebben wie scepenen vorseit dese letteren beseghelt vuthanghende met onsen zeghelen dit was ghedaen vp den neghene ende twintichsten dach van laumaend jnt jaer ons heeren alse men screef M CCC een ende viertich
</end>