Compilatiecorpus Historisch Nederlands 1.0 (CHN): ambtelijke teksten 1250-1800: brugge_1342_2

<begin>
et es ghewyst bi clais barde ende bi jan van den kersebome tresoriers van den hanbochte van den hanscoewerkers ende bi vele goeder lieden van den hanbochte ende bi deken ende bi vinders
</begin>
<main>
dat dese die hier na ghescreuen staen nemmermer ne doen dinghen die gaen ieghen tghemene van den hanbochte vorseit wie dat dade et ware vp sin hanbocht
vort dat gherken van zouchs doen sal eene pelghremasce ten heleghen crusce tasscen ende ene te vendome tons heren tranen als ment hem ver manen sal ende die te doene vp sin hanbocht te latene ende dier ghelike elc die hier na ghescreuen staen bi alle dat ment vonde bi der wet van deken ende van vinder[s] diere ieghen dade vort gille de brabandere doen sal ene pelegeremasce te onser vrouwen te hulstcerloo ende ene [] sinte moors te fosscec vort dier ghelike arnout de pastedebakere doen sal ene pelegeremase sinte [los] ende ene sinte mattis te trieren vort dierghelike coppin ijden soene doen sal ene pelegeremase te sinte winnochx te berghen ende ene sinte katelinen te roemen vort dat pieter metten barde doen sal ene sinte niclaus te ghent vort jan rikier de ionghe doen sal ene pelgheremase sinte victors te prouende ende ene sinte desprits ten rouwen ten heleghen crusce vort doen sal ene pelgheremase jan de scoetelare te onser vrouwen te riemen vort doen sal ene pelgheremase jan aghedoren sinte obrecht te lauwe ende ene sinte niclaus in warangevile vort doen sal ene pelgheremase herman van hutrech te sinte loie in noioen ende van elker pelegheremase goede vraie lettren te bringhene dat siese wel ghedaen hebben ende hier of sal hem ver manen tresories ende de [weet] vorseit met die te haren rade van den hanbochte nemen sullen wilcire dat si willen
</main>
<end>
in kennessen van desen dinghen hebben wie dit gheseghelt met den seghele van den hanbochte vorseit dit was ghedaen in iaer ons heren als men scref M ccc xli sinte amans daghe in sporkele
</end>