Compilatiecorpus Historisch Nederlands 1.0 (CHN): ambtelijke teksten 1250-1800: brugge_1343_1

<begin>
WJE Jan filius Robrechts deken Jan van Maldegheem Jan Colpaerd Jacop die wale ende jan duve wettelike deelmans in onser vrouwen ambocht in brucghe in dien tiden dat dese dinghen vor ons waren ghedaen doen te wetene allen den ghonen die dese lettren sullen zien Jof horen lezen
</begin>
<main>
dat Camen vor ons alse vorden deken ende vor deelmans der Michiel van bauinchoue an een side Ende Jan zeeboord af ander side Ende begherden an beden siden vorseit te hebbene een Recht landysceed tusschen haerre beder husinghen staende theen bachten andren in groeninghen Ende aldaer so wort matthijs de crooc borghe ende belouede te houdene ende den vorseiden here Michiele te houdene vast ende ghestade so wat dat wie van desen vorseiden landyscede wijsen souden ende naer deser borchtucht ghedaen so waren wie vorseide deelmans ghemaent vanden Rechte Ende wie wijsden dat wie begherden tehorne ende te ziene tsaerters jof leuende [] orconschepe die van desen vorseiden landyscede verclaersinghe Maecten vp datse yemene vanden vorseiden partien hadde die ghehord ende ghezien worden wiere Meer af ghemaent wie sonder Recht af wijsen Ende aldaer so daden zie hem an beeden siden hof van tsarters van landyschede ende wie horden aldie horconscepe die ziere an beeden siden af ghehoerd wilden hebben Ende naer den vorseiden tsarters af ghedaen ende horconschepe ghehoerd so waren wie vorseide deelmans vord wettelike ghemaend dat wiere Recht af wijsen souden naer al dats vor onslieden coemen ware die Maninghe ontfanghen wie vorseide deelmans wijsden naer der goeder claerre [] [] wielieden der of verstonden ende bi der goeder informachien die wiere of hadden van aernoude van [t]tkerke ende van janne zwine der stede van brucghe ghesworne werclieden dat jan zeeboord vorseit hebben ende behouden zal voren ter straten buten den cricskine dat staet an zinen zuutoost [cric]post van den oos[th]ende van zinen huuse ander aluen dume neffens derflechter eerden nordwaerd streckende bi den drade [] vp tcrixkin dat staet ten nordhende van jan zeeboorde steninen voete daer buten sone heeft jan zeeboord niet dits hare Rechte landyscheed an beeden siden vorseit
</main>
<end>
in kennessen van desen dinghen hebben wie deken ende deelmans vorseit dese lettre ghezeghelt met onsen zeghelen vuthanghende dit was ghedaen vpten twintichsten dach van april als men screef M ccc drie ende viertich
</end>