Compilatiecorpus Historisch Nederlands 1.0 (CHN): ambtelijke teksten 1250-1800: brugge_1343_2

<begin>
WJe Jan die waerd ende Clays die Sceerre Scepenen jn brucghe te dien tiden dat dese dinghen waren ghedaen doen te wetene allen den ghuenen die dese letteren sullen sien iof horen lesen
</begin>
<main>
dat Camen vor ons als vor scepenen Jan de lodine die tijcweuere ende margriete sijn wijf ouer hem lieden ende ouer hare lieder nacomers ende besetten den here Heinrike Pauwelse ende sine nacomers vp een Huus staende bachten freren muere in bonins stratekin an die oest side tusscen ser jans boudins soens camere af ene side ende gheraerds huse vanden echoute af ander side vp ser harnards lande van artrike ende der anderen diere toe behoren alse van drie sceleghe groter tornoysen jof die waerde daer ouer jn anderen payemente te gheldene elcs jaers naestcomende ende achteruolghende ewelike ende eruelike ghedurende dats te wetene achtien peneghe groter tornoysen te paeschen erstcomende ende achtien peneghe groter tornoysen te sinte bauesmesse daer naer eerstcomende Ende also vort telken vorscreuen termine achtien peneghe groter tornoysen in elc jaer Te gheldene nader vormen dat voren verclaerst es Ende hier bi so wedden ende belueden jan de lodine ende margriete sijn wijf vorseid an dat vorseide huus te licghene van timmeringhe ende jn beteringhe binnen enen jare naestcomende twintich sceleghe groter tornoysen vp cracht Ende ghebrake an dese vorseide besettinghe iet dat soe verdurne verbrande jof te nieute ghinghe ende der vorseider peninghen van jare te jare ende van termine te terminen naer dien dat vorscreuen es niet waerdich en ware dat wedden jan ende margriete sijn wijf ende beloueden ouer hem lieden ende ouer hare naercomers den vorseiden here heinrike pauwels ende sine naercomers te vulcomende ende te vuldoene vp haer lijf ende vp al tghoet dat sie hebben
</main>
<end>
Jn kennessen van desen hebben wie scepenen vorseid dese letteren beseghelt met onsen seghelen vuthanghende Dit was ghedaen jnt jaer ons heren alsmen screef dusentich drie Hondert drie ende viertich vpten neghensten dach jn October
</end>