Compilatiecorpus Historisch Nederlands 1.0 (CHN): ambtelijke teksten 1250-1800: brugge_1345_1

<begin>
WJE lamsin van aelst Clais de scauere Diederic van Berneem ende Jan volcaerd Jans zuene Dischmeesters vanden aermen scamelen huusweeken inde prochye van onser vrauwen in brucghe in dien tiden Doen te wetene allen den guenen die dese lettren zullen zien iof horen lesen
</begin>
<main>
Dat wie belouet hebben ende belouen loyalike ende in goeden trauwen ouer ons ende ouer onse naercomers die Dischmeesters ende berechters weisen zullen vanden vorseiden dissche ende aermen scamelen huusweeken broeder woutren van oorscamp Meester vanden Conuente vanden begaerden in brucghe in dien tiden te zinen bouf ende suorseids Conuents bouf te Cleedene den vorseiden disch vanden aermen vp elken sinte bertelmeus dach in elc Jaer naervolghende ewelike ende eruelike vordwaerd ghedurende met honderd prouenden elke prouende waerdich wesende achte peneghe parisize lichtelic min iof meer ter vorseider aermer bouf ende die te deelne ende te gheuene honderd aermen scamelen huusweeken inde vorseide prochie wuenende ouer de ziele van Meuse van braband metten viere ponden ende achte sceleghen parisize erueliker Renten elkes Jaers licghende inden dam vpt huus ende vp de erue dat wilen toebehoorde Claise lots de welke Meus vorseid ons vp ghegheuen ende vp ghdraghen heuet in vormen van aelmoesnen Ende vord onverminct te zine ende te bliuene dat wie vorseide Dischmeesters ende onse naercomers siin ende bliuen schuldich te gheuene den aermen gheuanghene inde donker camere elkes vrindaghes tallen daghen vordwaerd een tarwiin brood van zeuen ponden weghende lichtelic min iof meer al metter vorseider erueliker Renten elkes Jaers Ende ware dat zake dat wie vorseide dischmeesters iof die naer ons weisen zullen ende stede houdende alse dischmeesters vanden vorseiden dissche ende aermen scamelen huusweeken inde vorseide prochie in fauten wordden vander vorseider aelmoesnen te doene ende te gheuene in der manieren dat vorseid es dat de vorseide Meester ende Conuent zie ende haerleder naercomers hand zullen mueghen slaen ande vorseide Rente also dickend ende also menighe waeruen als wie vorseide dischmeesters ende onse naercomers tachter ende in ghebrecke weisen zullen vanden vorseiden prouenden ende brode te deelne ende te gheuene inder manieren dat vorseid es ende niet langher Ende dat de Meester ende de broeders vanden begaerden vorseid de vorseide prouenden deelen zullen in haerleder conuent ende tvorseide brood ter vorseider donker camere elc inder manieren dat vorseid es in haerleder conscientie also langhe als de faute ende tghebrec van ons ende van onsen naercomers weisen zal Ende vord kenneden wie Dischmeesters vorseid ende verlyeden dat wie ontfanghen hebben vanden vorseiden Meester vanden begaerden neghene goudine maillen van florencen omme eruelike Rente der mede te copene Ende die vorseide Rente te lecghene tote der ander vorseider Rente ende die te distribuerne ende te gheuene te helpen den vorseiden aelmoesnen te vulcomene ende te vuldoene Ende die laetste vorseide Rente also verbonden te zine ende te bliuene ghelike der eerster Rente in der manieren dat vorseid es
</main>
<end>
Jn orcontscepen der waerheden zo hebben wie dischmeesters vorseid dese ieghenwordighe letteren beseghelt met onsen zeghelen uuthanghende vp ons ende vp onse naercomers alse dischmeesters weisende ter vorseider stede te kennessen Dit was ghedaen vpten dartiensten dach van sporkele int Jaer ons heren alsmen screef dusentich CCC viere ende viertich
</end>