Compilatiecorpus Historisch Nederlands 1.0 (CHN): ambtelijke teksten 1250-1800: brugge_1362_1

<begin>
WJE Jan de Rode ende joris de maedchenare Schepennen Jn brucghe in dien tiden dat dese dinghen vor ons waren ghedaen doen te wetene allen den ghuenen die dese letteren zullen zien iof horen lesen
</begin>
<main>
dat camen vor ons als vor Scepennen Oliuier van westackere ende ver jehane zijn wijf ouer hem lieden ende ouer haerlieder naercomers Ende bezetten broeder symoen tholphine vpper meester ende broeder janne van ghistele onder meester van den couente van den becgaerden in dien tiden hemlieden ende haerlieder naercomers suorseits couents bouf ende suorseits couents vryen eghindome vp dat Rechte vierendeel ende vp dat Rechte achtenste deel van enen huus ende van den lande daer tvorseide huus vp staet vte ghesteken dat twee ende viertichste deel van den vorseiden huse ende lande algheheel staende bij den houden vleeschuse bij sinte saluators vpten houc van loppheemstraetkine twelke huus men heet laepscuere ende dat wilen was maertins smols naest den huus dat men heet ten hoorne Met viue sceleghe groter tornoyse lijfrenten elx jaers die bernaert priem de jonghe ende joncvrauwe marie zijn zuster jaerlix hebben an dit vorseide vierendeel ende an tvorseide achtenste deel van den vorseiden huse ende lande algheheel ghelijc dat vorseit es te harer beder liue ende tsghuens liue diere lancst van hem beden vorseit leuen zal Ende vort vp dat Rechte vierendeel ende vp dat Rechte een ende twintichste deel van den vorseiden huus ende lande staende ter vorseider stede ghelijc dat vorseit es Alse van neghen sceleghe groter tornoyse eweliker ende erueliker Renten elx jaers naest comende ewelike ende eruelike gheduerende te gheldene hier of ende te betaelne die ene helt te halfmaerte die nv erst comt ende die ander helt te sinte baefsmesse daer naer erst comende Ende also vort jn elc jaer naervolghende telker vorseider termine ewelike tallen daghen gheduerende Ende ghebrake an dese vorseide bezettinghe waert bij brande iof bij andren zaken hoe ende in zo wat manieren dat het mochte sijn ende zoe niet alse goet en ware als dese vorseide neghen sceleghe groter tornoyse eweliker ende erueliker Renten elkes jaers naest comende te gheldene telker vorseider termine in elc jaer ewelike ende eruelike gheduerende ghelijc dat vorseit es dat wedden ende beloueden oliuier van westackere ende ver jehane sijn wijf vorseit ouer hemlieden ende ouer haerlieder naercomers den vorseiden meester van den vorseiden couente ende haerlieder naercomers suorseits couents bouf vort te vulcomene ende te vuldoene vp haerlieder lijf ende vp al tgoet dat zie hebben zonder fraude ende enich malengien
</main>
<end>
jn kennessen van desen dinghen dat zie zullen bliuen goet vast zeker ende wel ghehouden zo hebben wie scepenne vorseit dese letteren bezeghelt met onsen zeghelen vuthancghende dit was ghedaen jnt jaer onsheren als men screef duzentich drie hondert twee ende tsestich vpten drie ende twintichsten dach van pietmaent
</end>