Compilatiecorpus Historisch Nederlands 1.0 (CHN): ambtelijke teksten 1250-1800: brugge_1362_2

<begin>
WJE michiel poeluoet Ende jan van basseuelde Scepenen jn brucghe te dien tiden dat dese dinghen vo[or] ons waren ghedaen doen te wetene allen den ghuenen die dese letteren zullen zien jof horen lesen
</begin>
<main>
Dat Cam vo[or] ons alse voor scepen verkateline jans stalpers weduwe Ende gaf halm ende wettelike ghifte den here zeghere [hoinne] als deken vander neringhe vanden makelaren binnen der stede van brucghe te dien tiden Ende voord hem allen die deken vander vorseider neringhen naer hem wesen zullen ten huuse bouf van belleem datter vorseider neringhe vanden makelaren toebehoord van viue sceleghe groter tornoise eewelijc elkes siaers de welke zoe heuet an achte cameren metten lande datter toe behoord staende ende lecghende ouer den vlamincdam naesteN heynrix braderix huuse wilen was af een zide ende der veste af ander zide achterwaerd streckende tote philips Rijnvischs lande die toebehoren clais maertene Ende den welken vorseiden eeweliken cheins men jaerlix gheld ten tween terminen binden jare dats te wetene die ene heltscede vanden vorseiden cheinse telken alf maerte jn elc jaer naest comende ende de ander heltscede telken sinte baues messe jn elc jaer daer naer eerst comende eewelike ghedurende Ende verkateline jans stalpers weduwe vorseid die wedde ende belouede den vorseiden here zeghere [hoinne] als deken vander vorseider neringhe vanden makelaren te dien tiden Ende voord hem allen die dek[en] vander vorseider neringhe van den makelaren naer hem wezen zullen svorseiden huus bouf dese vorseide viue sceleghe gro[ter] tornoise eewelijc cheins elkes siaers lecghende ter vorseider stede jnder manieren dat vorseid es te wetten te wae[rne] ende te warandeerne tsvorseiden huus van belleem vrien eighindomme tieghen elken meinssche
</main>
<end>
jn kennessen van de[sen] dinghen hebben wie scepen vorseid dese letteren huuthanghende bezeghelt met onsen zeghelen Dit was ghedaen jnt jaer ons h[eren] alsmen screef dusentich drie hondert twee ende sestich vpten eersten dach van october
</end>