Compilatiecorpus Historisch Nederlands 1.0 (CHN): ambtelijke teksten 1250-1800: brugge_1363_1

<begin>
Het si cond ende kenlijc allen den gonen die dese lettre sullen sien jof horen lesen
</begin>
<main>
dat wie broeder symoen tolfin meester vanden couente vanden beggaerden in br[ucghe] [in] dien tiden ende broeder jan van ghistele onder meester vanden voorseiden couente kennen ende verlien dat wi ontfanghen alle jare sesse schelighe ende sesse peneg[he] [groter] toornoyse ewelijcs tscheins beset vp zeuen cameren te gader staende inde lane van welken voorseiden sesse schelighen ende sesse peneghen groter toornoysen wi [sculdich] sijn te gheuene alle jare alse langhe als wi die voorseide rente ontfanghen drie schelighe ende sesse penighe groter toornoyse den fremenneren ten jaerg[etide] diederike van beerneem ende de andre drie schelighe groter toornoyse vander voorseider rente ten jacoppinen ten jaerghetide van joncvrauwe Marien van [beerneem] sire suster Ende het es te wetene dat wi dese voorseide rente niet langher sculdich sijn te gheldene dan alse langhe als wise ontfanghen moghen voort [] [] wetene came cost jof scade omme dese rente te mine die soude men minken vander voorseider rente vp elkerlike Ende wie mester ende ondermeester voorseid belouen ouer ons ende ouer alle onse nacomers dese voorseide rente wel te gheldene ende te betaelne ten voorseiden jaerghetiden alsoot voorseid es
</main>
<end>
Ende [] wi willen dat dit ghestadich bliue ende wel ghehouden so hebben wie meester ende ondermeester dese lettere gheseghelt met ons couents zeghele hut[ehanghende] dit was ghedaen int jaer ons heren als men screef sijn incarnacioen dusentich drie hondert drie ende sestich vp
</end>