Compilatiecorpus Historisch Nederlands 1.0 (CHN): ambtelijke teksten 1250-1800: brugge_1370_1

<begin>
WJE jan walkier gheraerd vanden moere Eueraerd goederic michiel van assenede Sheer michiels zuene Ende jacop van Rucelede ScepeneN jn Brucghe in dien tiden dat dese dinghen voor ons waren ghedaen doen te wetene allen den ghuenen die dese letteren zullen zien jof horen lesen
</begin>
<main>
Dat Camen voor ons alse voor scepenen g[illis] hoste filius Sere jans ende jacob van ghend filius Symoens vogheden van menkine van gillekine ende van hannekine bertholmeus kindren vanden walle filius Sere gillis filius Sere bertholmeus de welke [hij] hadde bi joncvrauwe jehanen zinen wiue Ende ghauen halm ende wettelike ghifte alse vogheden ouer de vorseide kindren bi concente ende ottroye vanden ghemenen h[o]pe van scepen[en] alse biden ghuenen die ouervogheden zijn van weesen der vorseider joncvrauwe jehanen bertholmeus wedue vanden walle van viue ponden parisisen eerueliker Renten siaers ande stede van Br[uc]ghe de welke vorseide Rente den vorseiden kindren verstaerf ghebuerde ende toequam van bertholmeus dood vanden walle vorseid haers vader Ende de vorseide vogheden alse vogheden ende de [vorseide] kindren wedden ende beloueden der vorseider joncvrauwe jehanen bertholmeus wedue vanden walle dese vorseide viue ponden parisisen eerueliker Renten elkes siaers ande vorseide stede van brucg[he] ghelike dat vorseid es te wetten te waerne ende te waranderne te haren vrijen Eyghindomme joncvrauwe jehanne vorseid jeghen elken meinsche
</main>
<end>
jn kennessen van desen dinghen hebben wie [sce]penen vorseid dese letteren huuthanghende beseghelt met onsen zeghelen dit was ghedaen jnt jaer ons heren M ccc ende tseuentich vpten zesten dach van ougst
</end>