Compilatiecorpus Historisch Nederlands 1.0 (CHN): ambtelijke teksten 1250-1800: brugge_1381_1

<begin>
WJE Bourghmeesters Scepenen ende Raed vander stede van Brucghe Doen te wetene allen den ghenen die dese letteren zullen zien jof horen les[en]
</begin>
<main>
[dat] wij anesiende den groten cost ende last die de vorseide stede langhen tijt ghehadt heift ende daghelix hebbende es in menigher diuerser manieren z[o] [] niet vermach van haer zeluen de zware ende grote costen ghedraghen die daghelix gheuallen zijn ende al nv wesen moeten ter ere van onsen g[h] prinche ten behoude van zinen goeden lieden van ziere stede van brucghe ende van zinen ghemeenen lande hem wel jonnende noch oec den scotters [] [] in desen jeghenwordighen tijt te versiene van haren paruren ter feesten vanden ommeganghe also zoe menich jaer ter eere vander stede gheplog[h] [] te doene hebben ghewilcuert ende gheconsenteirt wilcueren ende consenteren ouer ons ende ouer onse naercommers den here Jacoppe den visch [d] [] pietre van oestbuerch den here franchoise van zinghene den here Janne den ketelare Jacoppe van aertrike Janne vander steenbrucghe Maertine den [hardere] boudine vander mascht Janne den caestickere ende Janne moreel af den zessen van hemlieden in de name van al den ghemeenen vanden scotters [] [] vorseiden scotters bouf Mids dien dat zij onderstaen hebben ende tlast ghenomen te versiene te deser toecommender feesten vanden ommeganghe de pa[r] [f]frocken ten vorseiden scotters bouf ten coste ende ten laste vanden scotters vorseit van dat hemlieden bi onsen vorsaten gheconsenteirt was te heffene [] assise vanden hoppenbiere also de letteren te vullen verclaersen diere af ghemaect zijn in minderinghe ende paiemente van dat de vorseide stede [] sculdich was ende es dat te ontfanghene ende te Regierne also zij ghedaen hebben toten daghe van heden ende daer toe mede ontfanghen bi hemli[eden] dat de vorseide paruren ghecost zullen hebben dat zij dan voort an vallen ende bliuen zullen in haerlieder vorseider ontfanc na den teneur van ha[erre] letteren toter tijt ende der wilen dat zij vanden haren beede van paruren ende saute vulcommelike van al tal vernought ende betaelt zullen wesen
</main>
<end>
van welken dinghen hebben wij dese letteren beseghelt vuthanghende metten zeghele vander vorseider stede van brucghe dit was ghedaen int Jaer ons [heren] [M] CCC een ende tachtentich vpten twintichsten dach van aprille
</end>